Mad jingeh ki paidbah ka shnong Nongpriang, T.250 bai kit khaw bym don surok

Ki paidbah ka shnong Nongpriang kaba hap hapoh ka Hima Sohra haduh mynta ki dang ap khmih lynti ia ka jingkular ki politishan ban pynioh surok ha kane ka shnong. Ka jingbym don ia ka surok ha kane ka shnong ka la buh jingeh ia ki paidbah ha ka leit ka wan, ka kit ka bah bad kumjuh ha ka pang ka shitom. Ki paidbah kane ka shnong kaba don kumba 80 tnum iing eiei, ym tang ba ki mad ia ka jingeh haba iadei bad ka surok hynrei wat ka bording ruh kim ioh la kumba hynriew snem bad bun na ki, la hap ban shu thang da ki bording sngi ne ki Solar Light ban ioh jingshai. Ha kane ka shnong ki paidbah ki im da ka kam rep ka riang kum u synsar, sohniamtra, kwai, tympew, shriew, ka kait bad kiwei. Ha ka jingiakren bad u bah Amos  Shabong uwei na ki nongshong shnong, ula iathuh ba ki paidbah ha kane ka shnong ki thrang bad dang ap khmih lynti sah ban ioh ia ka surok, kumba ki politishian kila kular ha ka por ilekshon.

U la iathuh ba ki paidbah ki dang hap ban kit da ka met ia ki soh, u khaw, u synsar bad kiwei ki mar ki mata bad kane ka la pynduhnong ia ki namar ka bai kit la hap siew bun bad ynda la poi ha iew ka dor ka mur jong ki soh ki marrep ka la tad. Katkum ka jingiathuh u bah Amos, shi byrni u khaw ka bai kit kam duna ia ka T.200 ne T.250. “Kumba long ka pyrthei mynta baroh ki kwah ia ka jingsuk khamtam ha ka kit ka bah, khnang ba ki nongshong shnong ruh kin ioh ia ka kamai kajih ba biang bad shibun kiwei ki jingmyntoi,” la pynpaw u bah Amos.  U bah Amos ula pynpaw ka jingsngewkhia namar ba ka sorkar ka la ibein ia ki nongkyndong ba dang sahdien ba dang biej bad kam patiaw lehse tang namar ba dei ka shnong kaba rit.

Nalor ka jingbym don ia ka surok, kane ka shnong kam don wat ka bording la kumba hynriew snem kynthih kaba la pyllong ia ki briew ban shu shong dum bad don kiba pyndonkam noh da ka ding sngi ne solar light.U la iathuh ba na ka por sha ka por, ki la pynsngew sha ka sorkar hynrei la shu wan thung tang ia u nar bording post ha ka por shwa ka ilekshon tang ban pynbiej ia u paidbah.“Por jan ilekshon la iawan ialap ilekshon bad la iawan thung tang ia u nar bording hynrei ym shym la ioh bording,” ong u bah Amos.     U la ong ba ha kane ka ilekshon ba ladep ki nongshong shnong bun kiba phaikhmat noh sha ka Voice of the People Party ban khmih lynti ban pynurlong iaka jingangnud jong ki.