Man ki ilekshon shiteng samoi, jop ka party ba don ha sorkar:Saleng

U MP ka Congress na Tura u Saleng A Sangma ula kyntu ia ka Mehtab Chandee Sangma kaba dei ka kurim jong u Myntri Rangbah u Conrad K Sangma ban bat ia ka kular kumba ka la khlei sha u paidbah ka Gambegre konstitwensi ha ka por ba ka la khlei ha ka elekshon ba dang shu dep shen. Haba kren sha ki lad pathai khubor, u Saleng ula ong ba ka Chandee ba kan pynurlong ia ki jingkular kumba ka la khlei namar ba ka don ha ka sorkar khamtam ha ka jingpynioh kam pynioh jam.“ Nga kwah ban kyntu ia ka Mehtab Chandee ba kan pynurlong ia ki kular ba la khlei khamtam ba ka don ha ka sorkar, ki don bun ki ishu ba dei ban pynbeit,”ong u Saleng. 

Ka Mebtah Chandee ka la jop ia ka elekshon shiteng samoi na Gambegre kaba ju bat ka Congress da kaba pylliem ia ka TMC bad ka Congress kan wan balai. “Ki paidbah ka Gambegre kim peit ia ka party hynrei ki peit ia ki briew shimet.  Hynrei mynta ka jingshah rem u kyrtong ka Congress, imat kiba don ha ka bor, ki la pynthame da ka bor pisa bad da ki jingkular  ,” ula ong. Katkum ka jingong u Saleng ha man ki ilekshon shiteng samoi, ju jop beit ka party kaba don ha ka bor namar ba ki paidbah ki ju khmih lynti ba kin ioh ia ka roi ka par ha ka konstiwensi.

Ula ong ba watla ka Congress kam don ha ka bor hynrei ki paidbah ki la ai ka jingkyrshan kaba radbah kam pher watla kam poi sha ka jingjop. U la ong ba watla ka congress mynta kam don MLA ha Garo Hills, hynrei kane ka dang dei tang ka jingsdang bad kin sa nang trei shitom ban khyllie biang ia ka party.  “Ngim duh jingshaniah ia ki paidbah hynrei ngin nang iai trei shitom,” ula ong.