Mang ka sorkar pdeng T.10 Klur ban kyntiew ïa ka kam ri jingri ha Meghalaya

U Myntri ka Sorkar Pdeng uba khmih ia ki tnad Fisheries, Animal Husbandry bad Dairying & Panchayati Raj, u Rajiv Ranjan Singh hynin ka sngi, ula plié paidbah ia ka “Conclave on Dialogue for Holistic Development of Livestock Sectors in the North-East Region” kaba la pynlong ha nongbah Shillong.  Ha kane ka prokram la wan iashimbynta lang da u Myntri Khynnah ka sorkar pdeng uba khmih ïa ka tnad Fisheries, Animal Husbandry bad Dairying u George Kurian,  ki Myntri ka tnad Animal Husbandry bad Veterinary Services na ki jylla ka thain shatei lammihngi, ki ophisar, ki nongseng kam lajong, ki nongwad bniah bad kiwei kiwei. Haba kren ha ka jingïalang u Myntri ka Sorkar Pdeng, Rajiv Ranjan Singh ula pyllait paidbah katto katne ki projek kiba heh ha kane ka jingïalang, kiba kynthup ïa ki 15 tylli ki Entrepreneurship Development Project (EDP) hapoh ka National Livestock Mission (NLM) kaba kot T.10.93 klur, ka jingsdang ia saw tylli ki Fodder Farmer Producer Organization (FPO), ban sdang ia ka Regional Semen Production Laboratory bad Goat Semen Bank ha Khanapara hapoh ka NLM, ha ka jingbei tyngka kaba long T.337.29 lak.

Ula ong ruh, ba ka NDDB kan sdang ia ka khanasamari ha ki shnong ban plié lad ia ka jingsdang ia ki Multipurpose Dairy Cooperative Society ha Arunachal Pradesh, da kaba peit bniah ia ka Namsai, Lohit bad Lower Dibang Valley bad ula pynbna ba ka NDDB kan iatrei lang bad ka Assam, Arunachal Pradesh bad Tripura ha ryngkat kiwei kiwei ki jylla ban sdang ia ki Dairy Cooperative.Na ka bynta ka jylla Meghalaya, u Singh ula plié paidbah ia ka Intensive Cattle Development Project ha Khliehtyrshi kaba T.31.86 lak bad ka Multiplier Pig Farm ha Kyrdemkulai, Ri Bhoi District, ha ka jinglut jingsep kaba T.10.23 klur. Ula pyllait paidbah ia ka jingrwai ri syiar ha ka ktien Khasi kaba tip kyrteng kum ka “Ka Kam Ri Syiar, Kyntiew Ka Ioh Ka Kot,” ban kyntiew ia ka kam ri syiar ha ka thain, ha ryngkat ka jingpyllait paidbah ia ka Meghalaya Animal Administrative Report 2023-2024.

U Rajiv Ranjan Singh ula pyntip ba hapoh ka National Programme for Dairy Development (NPDD) bad ka jingkyrshan na ka bynta ki jingdon jingem, 29 tylli ki projek kidei kiba la ioh jingmynjur ryngkat ka jingbei tyngka kaba T.240 klur na ka bynta kumba 53 tylli ki distrik na baroh 131 tylli ki distrik ha ka thain shatei lam mihngi. Ka tnad ka thmu ban ai jingiarap pisa kaba T.250 klur ban kyntiew ia ki jingdon jingem kiba iadei bad ka kam pynmih dud, kyntiew ia ka bor ban thied ia ka dud na ka 1.5 lak litar ha ka shi sngi sha ka 3.5 lak litar ha ka shi sngi bad ban pynrung kyrteng ïa ki 70,000 ngut ki nongri jingri ba thymmai ha kane ka rynsan Cooperative.Ula ong ba ki jinglong jingman bad ka suinbneng jong ka thain shatei lam mihngi ki long kiba kham pher bad buh jingeh ia ka kam ri jingri, khamtam ka kam ri sniang, syiar bad ki jingbam bad ula kyntu ia ki sorkar jylla jong ka thain shatei lam mihngi ban plie ïa ka lad lyngba ka ‘Single Window’ ban pynsuk ia ka jingbei tyngka ki kompani shimet bad pynkhlain ia ka kam ri jingri.