Mang ka Sorkar T.4000 klur ban kyntiew kam jngohkai ha ka Jylla

Ka tnat Tourism ka Sorkar Jylla ka la buh thong ban pynbha ia ki surok ki ba pyniasoh ia ki jaka jngohkai pyrthei ha kylleng ka Jylla. Nalor ki surok ka tnat Tourism ka la shim ia ka rai ban pynbun ki jaka sah lane ki Home Stays bad Hotels khnang ban pynsuk ia ki nongshangkai pyrthei kiba wan jngohkai hapoh ka Jylla. Haba pyntip ïa kane u Myntri ka tnat Tourism u Bah Paul Lyngdoh ula ong, ba ka Sorkar Jylla ka la mang palat T.4000 klur ban kyntiew ïa pynbha ia ki jingdonkam hapoh ka tnat Tourism khnang ban khring shuh shuh ia ki jingwan jngohkai hapoh ka Jylla.

“Mynta ngin pynleit jingmut ha kaba pynbha ïa ki jingtei kum ki surok, ka Rope Way, ki Home Stays, ki Hotels khnang ban pynsuk ia ki nongwan shang pyrthei hapoh ka Jylla. Wat ia ka Project Rope Way ruh ngi la rai ban pyniasoh bad bun tylli ki shnong ha kaba ki nongwan jngohkai kin long kiba shlur ban leit jngoh ïa kawei pa kawei ki jaka jngohkai” la ong u Bah Paul. Ula ong, ka jingwan u Ed Sheeran ka la pynpaw shuh shuh ia ka Nongbah Shillong kum kata ka Nongbah ba ki nongtem ki kwah eh ban wan tem.

“Baroh ngi tip ba u Ed Sheeran u wan ba ar hapoh ka pyrthei bad nalor ka rynsan ruh ula kren shai ba ka Nongbah Shillong ka dei ka Nongbah ba biang bad kaba heh tam hapoh India bad pdiang ban pynlong concert. Kane kan nangai mynsiem shuh shuh ïa kiwei ki nongrwai ban wan sha Shillong” u la ong. U Myntri ula ong, ba ki don palat 30 hajar ngut ki nongwan shangkai pyrthei hapoh Shillong ban sakhi ïa u Ed Sheeran bad ïa u Mr Big bad kane ka jingkiew ki nongwan jngohkai pyrthei ka la iarap ym tang ia ka Sorkar hynrei wat ia ki briew kiba sengkam sengjam lajong. “Watla ngim pat ioh jingkhein lut hynrei ki trai Homes Stays bad Hotel ki la pynpaw ia ka jingkmen namar ki la ioh nongbha lyngba ka jingwan sah ki nongjngohkai pyrthei” u la ong.