Mih biang ka jingiakynad ha Maikhuli ba pyndam ka Assam ia ki jingthoh ia u Mot MGREGA

Ka jingiakynad kaba jur ka la mih biang ha ka shnong kaba don ha khappud ka jylla Meghalaya bad Assam kata ha Maikhuli, hadien ba la don ka jingkynnoh ba katto katne ngut ki nongshong shnong na Assam ki la leit ban tah rong ban pynduh pyndam ia ki jingthoh na u mot ba la tei lyngba ka skhim MGREGA jong ka pung ri dohkha kaba dei trai da ka shnong Maikhuli. Kumba la ioh jingtip, ba kane ka jingjia ia kynad ka la jia ha ka miet jong ka 30 tarik Naiwieng ha kaba la kynnoh ba katto katne ki briew na Assam ki la leit pynduh pyndam ia ki jingthoh na u mot jong ka jingtei jong ka skhim MGREGA ha ka shnong Maikhuli tad haduh ba ka la mih ruh ka jingiashoh ia dat hapdeng ki nongshong shnong ka Maikhuli bad na Assam, marmar tang mar ia ioh jingtip na ka liang ki bor pulit ka Meghalaya bad u Majistor ki la leit hiar ban tem ia kane ka jingiakynad sha katei ka jaka.

Watla, hadien ba ka la don ka jingpynheit da ki Majistor na Assam bad Meghalaya ha ryngkat bad ki pulit na baroh ar jylla, hynrei mynta ka step ka la mih biang ka huri hura kaba jur hynne ka step tad haduh ba ki nongialam ka Federation of Khasi Jaintia and Garo People (FKJGP) North Khasi Hills District lem bad ki nongialam ka All Raid Marwet People Federation (ALRMPF) ki la leit ban ai jingsynran ia ki nongshong shnong ka Maikhuli bad ruh kular ban ai ka jingiatreilang ban wanrah ia ka shongsuk shongshngaiñ ha kane ka shnong kaba hap ha khappud Assam bad Meghalaya. Haba kren bad ki Nongthoh Khubor halor kane ka jingjia, na ka liang u Deputy Commisioner ka Ri Bhoi District u Abhilash Baranwal, u la pyntip, ba mar ia ioh jingtip halor kane ka jingjia, marmar na ka liang ki bor pyniaid district ki la phah marmar ia u Majistor bad ki pulit ban leit tem ia ka jingiakynad hynrei namar ka jingdon katto katne ngut ki nongshimkabu ka la mih biang ka jingiahuri hura mynne mynstep ia kaba la lah hi ban tehlakam marmar.

U la ong ruh, ba na ka liang ki ar liang Sorkar ki dang pyntreikam ia ka Peace Committee ban peitngor ia ki kynrum kynram hapoh kine ki Shnong khappud bad ka Assam hynrei namar ka jingdon jong ki riew shimkabu ki ju mih ki jingiakynad bar ki kynrum kynram, hynrei na ka liang ki bor district ki la pyntikna ban kem naphang ia kito kiba shimkabu ban wanrah ia ka jingiapher jingmut ban pynthut ia ka shongsuk shongshngaiñ, ha kaba ia dei bad ka jingdawa ba ka pung ri dohkha jong ka Maikhuli ka dei ban hap hapoh Meghalaya, u la ong ba kane ka jingiakren ka don hapdeng ki ar liang mamla jong ka sorkar Assam bad Meghalaya. Ha kaba ia dei bad ka jingleit ai jingkyrshan da ki nongialam ka FKJGP, North Khasi Hills District ba la lamkhmat da u Bah Luistar Lyngdoh, President bad u Samla Ricky Majaw, General Secretary lem bad ki dkhot ki la pynlong da ka jingialang bad ki nongialam Shnong ha ryngkat ki nongshong shnong ka Maikhuli ban tip bniah halor kaei kaba la jia bad da kular ruh ban iai donlang bad ki na bynta ban pynneh ia ka shongsuk shongshngaiñ ha kane ka thaiñ.