Mih jyndat u kyrtong NPP na ‘Common Platform’ ha Liarsluid

Ka jingangnud jong ki paidbah nongshong shnong jong ki san tylli ki shnong hapoh ka Umroi Konstituensi ban ioh sngew ia kita ki nongrim ba ki kyrtong ban ai reng ha kane ka ileksion sha ka Khasi Hills Autonomous District Council (KHADC) kam shym la long kumba la thmu ne angnud namar ka jingbym poi ki kyrtong baroh bad kiba wan poi ki long u kyrtong ka NPP bad u kyrtong shimet ha katei ka Common Platform ba la pynlong ha shnong Liarsluid, Bhoirymbong. Ia kane ka Common Platform ba la pynlong da ka synjuk jong ki san tylli ki Shnong ba kynthup ka Liarsluid, Mynri-Umsning, Madan Rtiang, Khweng bad Itsohpa-ir la pynlong kyrpang ban ioh sngew bad ban pynshong nongrim ia kita ki nongrim, ba ki kyrtong na ki seng sain pyrthei bad u kyrtong shimet ki don na ka bynta ban kit ban bah ia ka jingdonkam jong ka Umroi Konstituensi lada ki poi sha ka thong ka jingjop ha kane ka ileksion MDC. Kumba long ha kane ka ileksion ha KHADC, na Umroi Konstituensi ki don 5 ngut ki kyrtong kynthup u Bah Rangkynsai Kharbuki na NPP, Bah MD Syiem na Congress, Bah Isynei Hinge na VPP, ka Samla Naphishisha Marwein na UDP bad u Bah George B Lyngdoh kum u kyrtong shimet.

Napdeng kiba poi ha kane ka Common Platform, u Bah George B Lyngdoh kum u kyrtong shimet, ula sei ia la ki nia ki jutang ban buh hakhmat ruh ia ka nongrim halor ka jingshah ktah ki khun ki hajar na ka jingai trading lisen pathar da ka District Council sha ki bar jylla ban sengkam sengjam kaba la ktah ia ka ioh kam ioh jam jong ki paidbah kiba lah ban trei ia ki kam bapher bapher, nalor kata ula kdew ruh ba un rah ruh ia ka mat ba ktah mationg bha ha ki shnong ki thaw kata ka long ka jingtuklar bad ka jingmushlia politik ki bor ka District Council ha ka riti synshar shnong, ka jingthung Rangbah Shnong, Syiem, Sordar bad kiwei kiwei. Ula kren shai ba lada u poi sha ka thong jong ka jingjop, ka mat ba kongsan ka long ban leit rah hapoh ka iing dorbar ia ki jingeh ki longiing baduk ba rangli ha ka jingioh bhah kum ki nongrim iing kaba la ktah shikatdei ia ki paidbah ka Umroi Konstituensi kaba la jia ruh tang namar ka jingbym bit bym biang ki kyndon ain bad ka jingtlot jong ka riti bat khyndew shyiap nalor kiwei kiwei ki mat kiba kongsan kiba u angnud ban leit rah sha ka District Council ban pynsuk pynshngain ia ka lawei jong ka Umroi Konstituensi. Na ka liang u Bah Rangkynsai Kharbuki, kum u kyrtong ka NPP ula pynpaw ba ma u kum u MDC ba la shakri mynta la 6 snem kynthih ula don bynta ha shibun ki kam jong ka Executive Committee ka District Council, ym tang ban don bynta ban wanrah ia ki kam pynroi hynrei kaba kongsan ka long ruh na ka jingiadon bynta ban pynkhlain ia ki ain bat khyndew ha kaba ka EC ka la lah ban thaw ia ka Land Bill kaba la ioh ruh ia ka jingmynjur na u Lat ka Jylla.

U la pharia ruh, halor ka jingjop jong ka EC kaba lamkhmat hapoh ka District Council ban ioh ruh ia ka jingithuh ban pynskhem ia ki kyndon ain ban iada ia ka ri bad ka jaidbynriew kiba kynthup ia ka Admisnistration of Elaka Amendment Act 2023 ban pynkhlaiñ shuh shuh ïa ki Dorbar Shnong, ki seng longkmie shnong, nangta ka Khasi Hills Autonomous District (Regulation and Administration of Land) Act, 2021 ban ïada ïaka jinglongtrai ha kaba ïadei bad ka khyndew ka shyiap, ka Khasi Social Custom of Lineage Amendment Act 2023, ban pynskhem ïaka rukom shim jait sha ka kmie nalor kiwei kiwei. Nalor, ka jingangnud jong ki paidbah na ki san tylli ki shnong ban ioh sngew ia kita ki nia ki jutang jong ki kyrtong kam shym la urlong namar ka jingbym wan shimbynta ki lai ngut ki kyrtong, kaba la nang pyndiaw pat ia ki ka long, namar ka jingmih jyndat u kyrtong ka NPP tang mar iadep ai jingkren khlem da shim bynta shuh ha ki kynta kylli jingkylli u paidbah da kaba ai daw ba u don jingialang shawei pat.