Mih ka Synjuk ki Rangbah Raid Sohkhwai ban pynrem ia ka jingiaid sahuh ki trok kit markhia na u surok Patharkhmah-Pahmmawlein

Ki nongialam jong ka Synjuk ki Rangbah Shnong ka Raid Sohkhwai mynta ka sngi ki la mih shakhmat ban pynpaw ia ka jingpyrshah kaba jur halor ka jingiaid ki kali kiba kit khia lyngba u surok ban rung na Patharkhmah-Umdu ban mih pat sha Pahammawlein 20 Mer ban pyniasoh ia u surok bah National Highway 06 ha Ri Bhoi District. Kane ka Synjuk ki Rangbah Shnong ka Raid Sohkhwai, kaba kdup ia ki 7 tylli ki Shnong ba kynthup ia ka Sohkhwai, Nongtyrlaw, Umdu, Kpep Syiem, Umladoh, Umsohma bad Umden La-ang ki la shim ia ka rai ban khang ia ka jingiaid jong ki kali kiba kit khia bad lada don kiba iaid pyrshah ia kane ka rai, ka Synjuk kan bat ia kita ki kali bad ban aiti pat sha ki bor ka ain. Na ka liang ki nongialam ka Raid ba kynthup ia u Bah Bristar Sylliang kum u President, ha ka jingiadonlang ruh u Bah Shanbor Rani, Samla Aibankitbok Sylliang Secretary ka Seng Samla Sohkhwai, ki la pynpaw ba ki la shim ia kane ka rai lyngba ka jingialang kaba kyrkieh ba la pynlong mynta ka sngi hadien ba la ioh ia ki jingujor kiba bun na ki paidbah nongshong shnong bad ki paidbah nongleit nongwan.

Ki la pynpaw, ba kane ka jingioh iaid lan jong ki trok kiba kit Khia ia ki mar ba kynthup naduh u shyiap, dewiong, ki maw, rnga bad kiwei kiwei ka la buh ia ka jingma ia ka iaid ka ieng ki paidbah na u tei u surok namar ka jingrit jong u surok khamtam kaba la ban wanrah ia ka jingjulor jong u surok namar u dei tang u surok ba la tei na ka skhim Pradhan Mantri Gram Sadak Yojana (PMGSY). Ki la pynpaw ruh ia ka jingsngewlyngngoh kaba khraw, ba balei kitei ki kali kiba kit khia kim iaid ne pyndonkam ia u surok bah ban kit ia ki mar khia ha kaba ki la pynmih ia ka jingsuba ba ka jingiaid na ki surok shnong ka lah ban dei ba kine ki kali ki thmu ban iaid lait na ka jingshah thew ia ki mar jong ki ha ki weight bridge kiba don ha u surok bah ha Umling.

“Ka jingiaid jong kine ki kali kit khia ka ktah ia ka leit ka wan jong ki paidbah ruh namar ba u surok na Umdu sha Pahammawlein u dei u surok u ba khim bha khamtam ha ki por mynmiet ki paidbah ki mad shibun ki jingeh” pynpaw ki nongialam ka Synjuk da kaba bynrap ruh ba kin khang shisyndon ia ka jingiaid ki kali kiba kit khia na u ne u surok bad ban thoh ruh sha u Deputy Commissioner ka Ri Bhoi District ban dawa shimkhia mardor halor kane ka bynta.