Mynjur ka KHADC ia ki Rules ban khang ot kilo ia ki mar rep ha Iew

Ka Khasi Hills Autonomous District Council (KHADC) hynne ka sngi ka la mynjur ia ki Rules jong ka Khasi Hills District (Establishment, Management and Control of Market Rules 2024. Ïa kane la wanrah da ka Executive Member (EM) ba khmih ia ka tnat Market ka Kong Grace Mary Khapuri bad ka iingdorbar jong ka KHADC ka la ai ka jingmynjur. Haba kren sha ki lad pathai khubor ka Kong Grace kala ong “Nga la wanrah ia ki kyndon jong ka Amendment Market Act kaba u Lat u la ai ia ka jingmynjur ha ka 23 tarik u Naitung 2023, bad hadien ba ngi la ioh ia ka jingmynjur na u Lat ngi la pynkylla ia ka Principle Act ban thaw iaki Rules”. Ka Kong Grace ka la ong ba ki kyndon (Rules) ki long kiba kongsan bha bad kin long ki jingmyntoi ym tang iaki nongrep hynrei wat iaki ki nongkhaii ruh.

“Ka jingthmu ba kongsan jong kine ki kyndon (Rules) ka long ban pynsangeh noh shi syndon ia ka jingot kilo iaki mar rep daki nongkhaii” kala ong. Ka Kong Grace kala ong ba katkum ki kyndon, ki nongrep ruh ki dei ban pynthikna ba ki thew bha ia ki mar shwa ban wanrah sha ki iew ki hat bad kim dei ban khleh lang iaki mar ba jhied bad kiba ryngkhiang. Nalor kane ka EM ba khmih iaka tnat Market, kala ïathuh ba ki kyndon (Rules) bala mynjur ka iing ki kynthup ruh ban tehlakam iaka jingleh Benami iaki dukan haki iew ki hat.

“Haki kyndon (Rules) la kren shai ba trai dukan ki dei ban pynrung kyrteng bad ha man la ka snem mang tyngka ki dei ban wan ban aiti la ki jong ki jong ki kaiphod sha ka executive committee (EC) lyngba ka sub-committee kaba ka market managing committee kan thaw” kala ong. Ka la ong ba lyngba ki kaiphod ba la aiti sha ka EC, ka KHADC kan ioh lum jingtip halor ka jingdon ki trai dukan bad ban lap ia kino kino ki jingpynkhein ia ka ain Benami ha ki iew ki hat ne ha kino kino ki jaka ha rilum Khasi.