Mynjur ka kynhun Myntri ban tei kolej Veterinary, Fishery bad Dairy, ong u Conrad

U Myntri Rangbah ka jylla Conrad K Sangma ula pyntip ba ka sorkar jylla ka don jingthmu ban tei ia ka kolej Veterinary Science & Animal Husbandry ha ka jylla.Ula pyntip ba ka  sorkar mynta ka dang pynkhreh ia ka Detailed Project Report (DPR).“Ha u snem 2022, ha ka jingialang jong ka kynhun Myntri sorkar, la rai ba dei ban buh ia lai tylli ki College kynthup ka kolej jong Veterinary, Fisheries bad Dairy,” ong u Conrad haba jubab ia ka jingkylli ba la wanrah da ka MLA ka Gambegre ka Mehtab Chandee Sangma hynne ka sngi ha iing Dorbar Thawain ka jylla.

Ula ong ba kine ki kolej ki long kiba donkam kyrkieh namar ba bun na ki paidbah ka jylla kidei kiba shaniah tylli ha ka kam ri jingri. Ha kajuh ka por u Myntri Rangbah ula iathuh ba ka sorkar ka la ioh ia ka jaka kaba heh haduh 800 akar ha thain Kyrdem Kulai, Umsning, Ri Bhoi ban buh ia ka kolej Veterinary. Hynrei kane kan kham shim por namar ba ka donkam shibun ka pisa bad tang na bynta ban pynieng ia ka Veterianary ka jinglut kan kot sha ka T. 334 klur.

Ha kajuh ka por, ula iathuh ba ka sorkar ka la buh ia ka jaka ai jinghikai ne ki Veterenary Training Centre.Ka MLA ka Gambegre, ka la pynsngew ruh halor ka jingduna ki nongtrei ha kine ki training Centre. Na ka liang u Myntri Rangbah ula mynjur ia kane bad ula bynrap ba ka sorkar ka la iakren halor kane ka jingeh bad ka la shim ruh ia ka sienjam ban pyntikna ba yn pyndap ia ki kam ba sah thylli.