Mynjur ka sorkar T.100 klur ban siew ia ki Nongtrei MCCL

Ka Kynhun Myntri Sorkar ka la mynjur ia ka song pisa palat T.100 klur ban ai sha ki 205 ngut ki Nongtrei Mawmluh Cherra Cements Limited (MCCL). Kum shibynta ban iarap ia ki 205 ngut ki nongtrei MCCL ki ban duh kam noh namar ka jingkhang dam noh ia ka MCCL, ka Sorkar Jylla ka la rai ban pyntreikam noh da ka Golden Handshake, lane ka Voluntary Retirement Scheme (VRS). Ka Sorkar kan pynlut ym duna ia ka T.100 klur ban siew sha ki Nongtrei ka MCCL lada pyntreikam da ka Golden Handshake, lane ka Voluntary Retirement Scheme (VRS) hadien ba la khangdam noh ia ka MCCL.

Haba kren sha ki lad pathai khubor u Myntri Rangbah ka Jylla u Conrad K Sangma u la ong, ba ïa kane ka rai ban pyntreikam noh da ka Golden Handshake, lane ka Voluntary Retirement Scheme (VRS) la shim hadien ka jingïakren sani bha bad baroh ki Nongtrei ka MCCL. “Hadien ka jingïakren sani bha bad ki Nongtrei MCCL, la rah ia ka jingïakren sha ka meij jingïakren jong ka Kynhun Myntri bad la mynjur ia ka song pisa. Hadien kane yn sa rah biang sha ki Nongtrei ka MCCL bad hadien ka jingmynjur lang da baroh, kan don ka jingiasoi ia ki kot ki sla ban ai ia ka song pisa bad hadien kata yn khangdam noh ia ka karkhana” la ong u Conrad.

Haba kylli u Conrad u la ong, “Hadien ba ki Nongtrei ka MCCL ki la mynjur ia ka song pisa, ka Sorkar kan sa bishar kumno ban leh ia ki tiar ki tar ba don hapoh ka karkhana lane ia ka jaka”.