Ban nang pynkhlain ia ki rukom ai jingsumar kiba paka ban pynpoi sha ki shnong nongkyndong na bynta ka jingmyntoi jong u paidbah na ka liang ka Glenmark Foundation ha ryngkat ka Society for Action in Community Health (SACH) mynta ka sngi ki la pynlait paidbah ia kawei ka kali sumar pang ba la jer kum ka Health on Wheels lane ka Mobile Medical Unit.
Ka jingthmu jong ka Glenmark Foundation bad ka SACH ban wanrah da kane ka project na bynta ki 20 tylli ki shnong nongkyndong ha Ri Bhoi District, khnang ba ki lad jingsumar kiba long na bynta ki longkmie ba armet, ki khyllung khynnah bad ki rangbah yn lah ban pynpoi sha kine ki shnong kiba jngai na ki jaka sumar pang paidbah bad ki bym lah ban poi ha ka por kaba biang.
La pynlait paidbah ia kane ka kali Mobile Medical Unit da u Dr. Celestine Lyngdoh, MLA ka Umsning Constituency kum u kongsan ha ka jingiadonlang ruh u Principal Secretary ka sorkar jylla u Sampath Kumar, ka Sweta Monjal, Chief Communication bad CSR Officer ka Glenmark Pharmaceuticals, u KP Rajandran bad kiwei kiwei.
Na ka liang u Dr. Celestine Lyngdoh haba kren ha kane ka sngi, u la pynpaw ia ka jingkmen halor kane ka project jong kine ki kynhun ban pynjan ia ki lad jingsumar sha ki paidbah ha ki shnong nongkyndong kiba kham pajih na ki jaka sumar paidbah bad kito kiba wan na ki longiing kiba duk kiban long shisha ki jingkyrkhu ia ki paidbah ban ioh ia ki lad jingsumar kiba paka.
U la pynpaw ruh, ia ka jingsngewnguh ia ka Glenmark Foundation bad ka SACH ba ki la shim ia kane ka sienjam da kaba ong ruh ba kane ka Mobile Medical Unit kan wanrah ia ki jingmyntoi shibun ïa ki paidbah.
