Na ka jingjia ha Thadlaskeiñ, bthah u MLA ban buh ‘Speed Breaker’ ha ki jaka bakhun surok ban lait ki jingjia aksiden

Hadien ka jingjia accident dangshen kaba la jia ha ka 21/08/25 ha Thadlaskeiñ Mukhla, West Jaiñtia Hills District kaba la wanrah ka jingkhlad arngut ki mynsiem briew na ka jingtynrah ka trok ia ki shikmie shikhun kiba dang iaid lynti, ha kaba u khun ula khlad katba ka kmie pat ka dang don mynta hapdeng ka jingshah sumar bad hadien kane pat ka la leit ban ia ka kali Eeco haduh ba u nongniah ruh ula khlad hashen, kumta hynne ka sngi na ka liang u MLA ka Jowai ula lum jingialang ia ka District Road Safety Committee na ka bynta ban ia pyrkhat iamir jingmut ban leh ei ei ia ki jaka ba buh jingma ia ki kali ba iaid ha surok kumjuh ruh ia ki paidbah ba iaid lynti.

Ha ka jingialang ba la pynlong ha Highwind hajan ka nan Thadlaskeiñ la donlang naduh ki bor district, ka tnat DTO, ka tnat pulit, ka tnat PWD, ka tnat jong ka koit ka khiah, ki nongialam shnong ka Mukhla pyllun bad kiwei.Hadien ka jingialang ki la ia leit jurip ia ki jaka ba i donkam ban leh ei ei khnang ban lait na ki jingjia ba sngewsih ia ki kali kumjuh ki briew, kata ha ki bynta ka surok ba jia accident dang shen ha Thadlaskeiñ bad nangne ki la ia leit sha Mookyndur ka bynta ka surok ba long khun bad kaba jia accident kali khah khah.Bad ha kane ka sngi ba ki leit jurip la don kawei ka trok kaba la kylla harud surok imat na ka daw ba u nongniah um lah shuh ban teh lakam ia ka kali.

U Wailadmiki Shylla haba kren sha ki lad pathai khubor u ong, ha ki bynta ka surok Thadlaskeiñ ula bthah ban shimkhia ban shna ki lynti iaid kjat namar dei ka jaka ba bun ki paidbah ba iaid lynti kynthup naduh ki khynnah skul, nalor ban buh ruh ki speed breaker khnang ban shngaiñ ki paidbah khlem da ktah pat ia ka jingdheng kali. Nangta ha shnong Mookyndur kaba dei ka jaka ba long khun bha bad kaba wanrah ka jingjia ba sngewsih na ka jingiatyngkhuh kali bad hap kali khah khah, u ong donkam ban buh ki dak ki shin ba shai kumjuh ki speed breaker khnang ba ki kali ruh kin pynjem lypa na jngai shwa ban poi ha jaka ba long khun.