Na kadaw ka SIR, dawa ka CoMSO ban tehlakam ïa jingwan rung kiba na WB bad Assam

Ki sengbhalang ka jylla hapoh ka lama jong ka Confederation of Meghalaya Social Organisation (CoMSO) kila dawa na ka Sorkar Jylla ba kan shim mardor ia ki sienjam ban tehlakam ia ka jingwan rung ki briew na ka jylla West Bengal bad Assam, khamtam haba ka don ka jingleh ia ka Special Intensive Revision (SIR) ha kine ki Jylla.Kane ka jingwan rung kine ki briew kan buh ha ka jingma ia ka jinglong jingman, jingshngain bad ia ka hok jong ki nongshong shnong ka Meghalaya.

Katkum ka kyrwoh na u Chairman ka CoMSO u Bah Roykupar Synrem, ula pynpaw ba ka sorkar Meghalaya kadei kaba la shah pynkup bor katkum ka aiñ bad kadei ruh ka kamram ka jongka lyngba ki kyndon aiñ ki bapher bapher ban tehlakam ia ka jingwanrung, ban khmih bniah ban pynshisha bad ban pyntreikam ia ki kyndon ban pyrkhing ba kan ym don kano kano ka jingpynthud ia ka shongsuk shongsain. Namar ka jinglong jingman mynta, ka jingbym leh eiei ne shim ia kino kino ki sienjam ka lah ruh ban lam sha kaj ingbym lah treikam jong ki bor kiba dei khmih kaban ktah jur ia ka jingshngain hapoh ka jylla bad ia ka jingsynshar paidbah.“Ngi dawa ban shimkhia mardor ia ki sienjam katkum ka ain, da kaba pyntreikam ia ki kyndon aiñ ban pyrkhing bad haba donkam dei ban khang ia ka jingwan rung ki briew sha Meghalaya tad hadien ka jingpyndep ia ki jingpynshisha bad tip ba kim dei kiba buh jingma. Ban phah rejister kaba dei ban long kaba kongsan, ban pynshisha bad ban buh da ki jingthoh ia kine baroh ki briew kiba wan rung shapoh Meghalaya na ki thaiñ kiba shah ktah na ka SIR” la pynpaw u Chairman ka CoMSO.

Ka CoMSO kala dawa ruh ban buh ia ki Pulit bad ki bor pyniaid District ha baroh ki jaka rung kiba kongsan, ban pynkupbor ba kin pyntreikam ia ki aiñ kiba lah ban pyntreikam, ban pynmih mardor ia ki jingpynbna kaban treikam mardor ban khmih bniah ia ka jinglong jingman kaba lah ban ktah ia ka jingshngain, ryngkat bad ka ai jingbthah ia ki DC bad SP bad ia ki bor sorkar kiba khmih ia ki khappud ban pynmih mardor ia ki jingpynbna paidbah kaban pynshai ia ki sienjam kiban shim, ki bynta jong ka aiñ ka kanun bad ka jingkhmih lytni ban ioh ia ka jingiatreilang na ki paidbah bad ruh ban don ka jingiatreilang bad ki bor sorkar na ka jylla West Bengal bad Assam ban pynshisha ia ki jingtip baroh bad ban khanglad ia ki briew ki bym don kot don sla na kitei ki jylla ban rung sha ka jylla Meghalaya.U Bah Roykupar Synrem ula ong ba kane ka kam kadei na ka bynta ka jingshngain jong ki paitbah bad ka jingkitkhlieh jong ki bor aiñ. Ki paitbah ka Meghalaya ki khmih lynti ba ka sorkar jylla kan shim ia ki sienjam khlem da pynslem shuh, kaba skhem, kaba shai kdar, kaba shongaiñ bad kaba da sngewkhia jur bha.