Na ki jingjia u snem 2019, duna ki nongwan shangkai ha Syntung

Ka kam jngohkai ka la hiar bha ha ka thain Syntung kaba hap ha Mawkynrew konstitwensi ha ki snem ba la dep hynrei naduh ba la wan iuhkjat biang u Myntri Rangbah u Conrad K Sangma mynshem snem, ka kam jngohkai ka la sdang kiew biang.
Ïa kane la iathuh u sordar ka Syntung u bah Robert John Pale haba iakren bad ki lad pathai khubor.
U bah Robert John ula ong ba hadien ka jingjia ha u snem 2019, ka la don ka jingktah bha ia ka kam jngohkai ha ka thain Syntung ha kaba ki briew ne ki nongwankai
ki duna bha hynrei dang shen kane ka la sdang ban kiew biang ha kaba ki briew ki wan ban mad ia
ki jingitynnad ka mariang ha katei ka thain kum ka wah Rashi, bad kiwei.
“Naduh ba wan u Myntri Rangbah, mynta ka kam jngohkai ka la iaid bha ha kaba ha ka shi sngi, ki don da ki spah ngut ki nongwan kai ha kane ka thain,” la iathuh u Sordar.
U Sordar ka Syntung ula iathuh ba lyngba ka kam jngohkai, ka shnong ka la lah ruh ban kyrshan ia ki jingdonkam ka skul kaba seng ka shnong bad ka la ai kam ai jam ruh ia ki samla ha ka shnong.
Hynrei kawei kaba ki briew ki kham kiar ban wan ka dei namar ba sniew palat ka surok, la ong u Sordar ka shnong Syntung.
U la ong ba lada ka bha ka surok kan pynsuk bad pynsngew tynnad ia ki briew kiba wankai bad ula kyrpad ia ka sorkar ba kan peit lem ia kane ka bynta na ka bynta ban kyntiew ia ka kam jngohkai bad ka ioh ka kot jong ki nongkyndong.