Na 7 sha 37 ki ksew pulit, kyrpang jong ka K-9 Unit

U Symbud Myntri Rangbah ka jylla uba khmih ia ka kam Pohiing u Bah Prestone Tynsong hynne ka sngi ula pyntip ba mynta kila don 37 tylli ki Ksew Pulit kyrpang jong ka K-9 Unit ia kaba mynshwa la sdang tang da ka jingdon 7 tylli ki Ksew Pulit.
U Bah Prestone Tynsong ula kren ia katei hynne ka sngi, ha ka jingialang ban ai burom ia ki Ksew Pulit kiba la shongthait noh na ka kam bad kumjuh ban pdiang sngewbha ia ki Ksew Pulit kiba la rung thymmai ha ka kam, kaba la pynlong ha MLP 4th Batallion, Mawiong.
U Symbud Myntri Rangbah ula ong, “Nga dap da ka jingsarong ban pynbna ba ngi lah jam na ka jingsdang kaba don tang 7 tylli ki Ksew Pulit bad mynta ngi lah jam sha ka jingkhlain da ka jingdon 37 tylli ki ksew pulit. Lyngba ka DREAM Mission bad ka jingpynrung thymmai ia ki 24 tylli ki ksew kiba la ioh jinghikai pyntbit. Ngi la lah ban kynjoh sha ka jingbit jingbiang”.
U Bah Prestone ula ong, naduh ba la sdang ha u snem 1975 hapoh jong ka CID Wing, ka Meghalaya Police K-Nine Unit kala long u paia ha kaba iadei bad ka jingshngain na ka bynta palat 50 snem, ka K-9 Unit bad ki nonghikai jong ki ksew ne Handlers kila long kiba hakhmat eh ban iada na kiei kiei ki bym lah ban iohi, ki jingsniew kiba rieh jong ka jingkhaii tuh ia ki jingdih pynbuaid kiba be-aiñ, ka jingbuhrieh ia ki tiar pynbthei bad ban bud ia ki dienjat jong ki riewsniew kiba ialeh ban lait na ka jingbishar kaba hok.
Ha kine ki snem kiba la leit, kane ka Unit kala long kaba seisoh ha kiba bun ki kam, ha kylleng ki district, ban iada ia ka jingim bad ban pynneh ia ka shongsuk shongsaiñ.
“Ha kaba iadei bad ki tiat pynbthei ha ki jaka riat ha East Garo Hills, South Garo Hills bad West Garo Hills, ki K-9 kila lah ban sma ban lait na ki jingma ha ki jaka kiba don jingma bha, man la ki jinglap ki jongki kadei kaba la lah ban lait na kino kino ki jingjia kiba sngewsih bad la ioh noh ia ka jingiada” la ong u Bah Prestone.
U Symbud Myntri Rangbah ula ong, ba ha ka jingiakhun pyrshah ia u droks, la lah ban pynkhlain da ka jingdon kane ka Unit ha kaba ha u snem 2023 ha Ri Bhoi district la ioh ban kuru pia u droks Heroin uba shongdor T.5 Klur bad dang shen la ioh kurup 691.54 gram na Shillong bad mynta u snem ka K-9 unit kala pyni ba ym lah ban buhrieh eiei lada sngewstad katno katno ruh kaban lah ban iaid lait na kane ka kynhun peitngor.
Ula iathuh ruh ba ki don 10 tylli ki Ksew kiba la pyntbit ha kaban sma ban lap dien ia ki nongleh kam sinew na ka bynta ban pynlong ia ka jingtohkit, 14 tylli ban pyndonkam na ka bynta ban iakhun ia ka jingkhaii droks, 11 tylli ki ksew pyntbit ban lap ia ka jingbuhrieh ia ki tiar pynbthei bad 2 tylli ki ksew kiba pyndonka mha ki jingkhynra kiba eh bad ia kine ki ksew yn sa buh ha kylleng ki district jong ka jylla.
U Bah Prestone ula ai ruh ka jingiaroh ia ki nongkhmih ia kine ki ksew ne ki Handler namar ba kine ki ksew kin lah ban treikam bha tang lada ki briew kiba ialam ia ki, ki hikai ban long kiba bud ryntih ia ki jingbthah bad ki don ia ka jingiadei bad ioh ia ka jingshaniah kiban long ka enjin kaba shisha jong kane ka Unit ban ioh ia ka jingjop.
“Phim shu ia iaid lang, phi im bad ring mynsiem lang ha ka mishon ka jong phi” ong u Bah Prestone bad ka bynrap ba ka sorkar ka iengskhem halor ki kam tohkit bniah, ban ai ki jinghikai kiba kyrpang bad kiba kham halor, ki jingtei kiba paka bad kaba kongsan na ka bynta ka bha ka miat jong kine ki ksew kiba ai ka jingshakri haduh ki sngi kaba kila ioh ba nshongthait noh.
U Symbud Myntri Rangbah ula pynkut da kaba ai khublei ia ki 3 tylli ki ksew pulit kiba la shongthait noh na ka kam bad ula pdiang sngewbha pat ia ki ksew pulit kiba la rung thymmai ha ka K-9 Unit ban ai jingshakri ia ka jylla.
U Bah Prestone ula pyndep ruh da ka takma ia ki ar tylli ki ksew kiba la shongthait noh na ka kam ha kaba la iadonlang ka DGP ka Jylla ka Kong I Nongrang, ki heh ophisar pulit ka jylla bad kiwei kiwei.