Na u Lat phah tuklar ka KSU halor ki mat ba kongsan kynthup ka jingdawa pyntreikam ILP

Ka Khasi Student Union (KSU) hynne ka sngi ka la kynduh ia u Lat ka Jylla u CH Vijayashankar ban phah tuklar ia 6 tylli ki mat jingdawa jong ka seng kiba dang sahteng haduh mynta. Kine ki mat ki kynthup ban pyntreikam ia ka Bengal Eastern Frontier Regulation (BEFR) 1873 lane ka Inner Line Permit (ILP) hapoh Meghalaya, weng noh ia ka jingpyntreikam ia ka Amendment jong ka Citizenship Act 2019, ka Indo-Nepal Friendship Treaty 1950, ban pynbeit ia u pud u sam hapdeng Meghalaya-Assam, ban pynrung ia ka ktien Khasi ha ka khyrnit ba phra bad ban thaw da ka Central Agricultural University (CAU). Ka seng ka la pynpaw ba ka jingpyntreikam ia ka BEFR 1873 lane ka ILP kan iarap ban tehlakam ia ka jingwan buhai shnong ki bar Jylla hapoh jylla Meghalaya.Ka KSU ka pynpaw ba jan baroh ki Jylla hapoh ka thain shathei lammihngi (North East) ki don ia ki ain ban tehlakam ia ka jingwan buhai shnong ki bar Jylla khnang ban pynneh ia ka jinglong tynrai bad ka jingbun paid ki riewlum ha ki Jylla.

Ka KSU ka pyntip sha u Lat ka Jylla ba ka jingdawa ban pyntreikam ia ka ILP ka dei naduh u snem 1985 bad ka iingdorbar thawain jong ka Meghalaya ka la mynjur ruh da ka Resolution ha ka 19 tarik Nohphrah 2019 hynrei haduh mynta ka Sorkar Pdeng kam shym la jubab halor kane ka jingdawa.”Namar kane ngi kyntu ia phi ban shimkhia ban iakren bad ka Sorkar Pdeng ban pyntreikam mar dor ia ka ILP hapoh Meghalaya” la ong ka KSU. Ka KSU ka la pynsngew ruh ha u Lat ka Jylla, ba dei ban weng noh ia ka jingpyntreikam ia ka Amendment jong ka Citizenship Act 2019. Ka KSU ka la kyrpad ia u Lat ka Jylla ban iakren lem bad ka Sorkar Pdeng ban pyllait noh ia ka Meghalaya na ka jingtreikam ka Indo-Nepal Friendship Treaty, 1950. “Kumba long ka CAA, ka India-Nepal Friendship Treaty 1950, kaba ai lad ia ki nong Nepal ban ioh long nongshong shnong ka India khlem kino kino ki kyndon, ka la ktah jur hangne ha Jylla Meghalaya. Naduh u snem 1980, ka Meghalaya ka la sakhi ia ka jingnang heh paid Nepali hapoh ka Jylla, kaba buh ha ka jingma ia ki riewlum rit paid ka Jylla, kaba lam sha ki jingiakynad hapdeng ki ar kynhun. Ki paid Nepali ki la pynkha ia ki jingeh ha ki jaka khappud ka Meghalaya ban tynjuh bor ia ki riewlum trai jylla halor ka hok ia la ki jong ki jaka bad ka Jylla” la ong ka KSU.

Haba ia dei bad u pud u sam, ka KSU ka kyntu ia u Lat ka Jylla ban iakren bad ka Sorkar Pdeng ban pynthikna ba ki jaka iakajia ba hap hapoh u pud u sam jong ki Hima Khasi, dei ban kynthup lang noh hapoh u pud u sam ka Meghalaya. Nalor kane ka KSU ka pynsngew ruh sha u Lat ka Jylla ban iakren bad ka Sorkar Pdeng ban kynthup noh ia ka ktien Khasi ha ka khyrnit ba phra jong ka Riti Synshar bad ban wanrah ia ka Central Agricultural University ha Meghalaya kin urlong shisha.