Na u Symbud Myntri Rangbah phah tuklar ka NMMDF ban pynsted thaw Umden CRD Block

Ka Nongtluh Mathan Marmain Development Forum (NMMDF) ha ka jingialam u MLA ka Nongpoh constituency u Bah Mayralborn Syiem hynne ka sngi ka la wan ban bud dien haba iadei bad ka jingdawa Umden Community & Rural Development (C&RD) Block Ri-bhoi District. Ha kane ka sngi ka Forum ka la kynduh ia u Symbud Myntri Rangbah ka Jylla u Bah Prestone Tynsong ban phah tuklar khnang ban pynurlong ia ka jingdawa ki paidbah ka thain Ri-bhoi District. Haba kren sha ki lad pathai khubor u MLA ka Nongpoh constituency u Bah Mayralborn Syiem ula ong ba haduh mynta ki paidbah naki shnong jong lai tylli ki Road kata Nongtluh Mathan bad Marmain ki dang hap ha ka jingpeit ka Umling Block kaba dei ka block kaba heh tam ha Ri-bhoi District.

U Bah Mayralborn ula ong ba ka Umling Block mynta ka ai jingshakri ia palat 224 tylli ki shnong bad dei namar kane kala donkam eh ban phiah noh sa kawei ka Block kata ka Umdeb CRD Block. “Ki don palat 130 tylli ki shnong kiba don ha ki lai tylli ki Raid kata ka Nongtluh, Mathan bad Marmain bad kine ki shnong ki jngai ym duna 80 km Umling C&RD Block namar kata donkam ban pynkha noh daka Umden CRD Block khnang ban pynjanai bad pynjan ka jingshakri paidbah” la ong u Bah Mayralborn. U Bah Mayralborn ula ong ba kane ka jingdawa CRD Block kadei kaba la slem bad ka Forum kala dep ruh ban phah dorkhas sha u Myntri Rangbah ka Jylla u Conrad K Sangma bad sha u Myntri Sorkar barim u AT Mondal hynrei haduh mynta ka Sorkar kam pat phah ktien.

U MLA ula iathuh ba ha ka jingiakynduh bad u Symbud Myntri Rangbah, la ioh jingtip baka Sorkar ka la bthah iaka ophis Deputy Commissioner (DC) Ri-bhoi District ban eksamin iaka jingdawa Umden CRD Block bad ban pynbiang iaka kaiphod halor ka jingdawa.”Hadien ka jingiakynduh ia u Symbud Myntri Rangbah ngi ngeit bad ngi khmih lynti baka Sorkar kan shim khia ia kane ka jingdawa ki paidbah ka thain Ri-bhoi District na ka bynta ka bha ka miat ki paidbah ka thain” ula ong.