Na u synniang ki nongshong shnong maramot ka Dong Pingwait ia ka surok

Ban ialeh ban weng ia ka jingeh ba mad da ki nongshong shnong ha iaid ka ieng bad ka kit ka bah ka Dong Pingwait ka shnong Mawlai Mawroh ka la maramot hi ia ka surok dewbilat da kaba lum ia u synniang na ki nongshong shnong bad na ki Dong ba marjan ba pyndonkam ia katei ka surok.

Ia kane ka surok dewbilat la tei ha u snem 2017-2018 lyngba ka scheme na ka Khasi Hills Autonomous District Council (KHADC) hynrei mynta hadien katto katne snem kane ka surok dew bilat ka la sniew bad la mih bun ki thliew bad wat ki maw ruh ki la mih lut kaba la buh jingeh ia ki kali ne thuk thuk ban iaid na kane ka surok khamtam ha ki jaka ba long pynnoh haba ki la don ruh ki jingjia ba ki thuk thuk ki kylla ha por ba ki iaid.

“Ngi lah pyrshang ia ki lad ki lytni ban ioh ia ka jingiarap ban shna pynbha ia ka surok hynrei kine ki jingpyrshang kim shym la poi shano shano ruh. Ngi lah pynsngew ha u MLA bad MDC ka Mawlai bad bun sien ki la ia wan peit hynrei ki la shu kut tang ha ki jingkular katba ka surok ka la nang jot bad ka la buh shibun ka jingeh ia nongleit nongwan” ong u Rangbah Dong ka Pingwait u Bah Strong Pillar Mawtlang.

Ula iathuh ban weng ia kane ka jingeh kaba la mad da ki paidbah, kumta ki nongialam ka Dong Pingwait kila lum ia ka jingialang bad da kawei ka sur kila shim ia ka rai ban kyrpad ia ki nongshong shnong ba kin noh synniang kat kaba ki lah ban ioh maramot ia kane ka surok kaba la sinew bad ka pynpaw ka jingsngewnguh ia ki nongshong shnong kiba don kali ne ki bym don kali bad wat ia ki Dong kiba marjan kiba la noh kylluid ia u synniang ban ioh maramot ia kane ka surok dewbilat.

U Rangbah Dong ula iathuh ba haduh mynta kila iohlum T.70,000 bad ki dang ap khmih lynti ba kito ki nongshong shnong kiba don kali kin sa wan ban noh ia u synniang jongki khnang ba ka kam maramot kan iaid shakhmat bad ula ong, ba ka jingmaramot ia ka surok kan shong eh ha ka jingioh ia u synniang bad katba dap ka pisa kin ialeh ban maramot noh shwa tang ia ki jaka kiba la sniew palat.

Katba u Secretary Shnong u Bah PM Hynniewta ula ong ba ki nongshong shnong kiba noh synniang ki kynthup ia kiba don kali bad wat ki bym don kali bad la ioh ruh ia ka jingnoh synniang na ki Dong kiba marjan kiba pyndonkam lang ia kane ka surok ha ka leit ka wan ka jongki bad kane ka pyni shai kdar ia ka jingdon ia ka jingiatylli ha kaba iadei bad ka jingthmu ban maramot ia kane ka surok kaban pynsuk ia ka leit ka wan jong ki nongshong shnong kiba don ha kane ka thain.