Nalor ba sniew surok sa ka shah pynjaboh ka Nongkhnum

Ka Dewlynnong Bah Nongkhnum , kaba la tip paidbah kum ka dewlynnong kaba ar ha ka jingheh ha Asia, mynta ka la nang duh noh ïa ka jingitynnad jong ka namar ka jingjot rathai ka surok bad ka jingshah pynjaboh ïa ka mariang bad shah pynsniewdur ia ki jingdong jingem. La sakhi ba nalor ka surok ban leit sha katei ka dewlynnong ka la jot bha, mynta sa ki sawdong sawkun jong katei ka jaka ki la shah pynjaboh ha u bynriew namar kam shym la don ka rukom treikam kaba paka ban lum bad pynkhuid ïa ki jaboh, kaba la pynlong ïa ki plastik, ki bilor, ki kot song jingbam bad kiwei ki ñiut ba kin shah bret pathar ha ki sawdong sawkun.

Ka dewlynnong kaba ju pawnam da ka madan shyiap kaba heh, ka um kaba khuid bad ka jingitynnad ka mariang lyngba ki kshaid ba noh rymphum, mynta ka la sdang kylla dur bad sakhi ruh ïa ka jingduna jong ki nongwan jngohkai.Ka jinghiar jong ki nongjngohkai ka la ktah ruh ïa ka jingïoh kam jingïoh jam jong kiba bun kiba shaniah ha ka kam jngohkai ban kamai jakpoh.Ki nongshong shnong ki la pynpaw ïa ka jingsngewkhia kaba jur halor ka jingbym shimkhia jong ki bor ba dei peit, watla ka Nongkhnum ka dei kawei na ki jaka jngohkai ba kongsan ha ka West Khasi Hills district.

Ka Kong Emelia Khongwar bad ki nongshong shnong ki la pynpaw ïa ka jingsngewkhia kaba jur halor ka jingbym iohi ïa kano kano ka sienjam ba shai na ki bor ba dei peit, watla ka Nongkhnum ka dei kawei na ki jaka jngohkai ba kongsan ha ka West Khasi Hills district. Ka la kyntu ruh ïa ki nongwan jngohkai ba kin kiar na ka jingbret pathar ïa ki ñiut ki ñier ha bad sawdong ka dewlynnong, hynrei ban song bha ïa ki jaboh bad buh ha ki dustbin ne ban rah noh pat bad ki haba ki leit phai.