Namar ka jingsngew niam, shem jingeh ka BJP ban pynkhlaiñ ha Meghalaya

Ka kam niam ba la leh da kiwei seng sain pyrthei ka long kumba khanglad ban pynkhlain ia ka party BJP ha Meghalaya.Haba kren ha ki nongthoh khubor hynnin ka sngi, u nongaiktien ka BJP ha jylla u bah M Kharkrang ula ong, ka niam ka dei ka jingtynjuh ba khraw ba ka party ka iakynduh haba ka pyrshang ban pyniar ia ka seng hapoh ka jylla.Ula ong, ia kane ka mat la iakren ha ka jingialang (executive meeting) hynnin ka sngi kumno ban pynkut noh kaba la ktah na ka por sha ka por.

“Na kaei ba nga iohi, ka jingtynjuh ia ka BJP ha Meghalaya ka long tang ka niam kaba la leh da ki seng sain pyrthei, kiba pyrshah ia ka BJP”, la bynrap u bah Kharkhrang da kaba ong. “Lada ki briew ki peit sha lyndet, ka party ka lah ban seng ia ka nongrim ba skhem”, u la ong.Ha ka jingialang la wan iashim bynta da ki riew shemphang bad ki nongialam na Delhi da ka jingthmu ban pynkhlain ia ki rukom treikam ka seng naduh tynrai bad ban kyntiew ia ki kam pynroi.U bah Kharkrang ula ong, ka jingialang ka la pynksan ia ki mar kular ka seng ban kyntiew ia ka Ri India naduh ki tynrai, katkum ka jingangnud u Myntri Rangbahduh u Narendra Modi.

Halor ka jingkylli u bah Kharkrang ula iathuh ba ym shym la iakren ha ka jingialang halor ilekshon MDC GHADC ban wan.Ha kaba ïa dei ka jingshim ram ka NPP na bynta ki skhim sorkar pdeng, ula ong ka jingthmu jong ka seng ka long ban pynthikna kiba dei hok kin ïoh ïa ki jingmyntoi, khlem da kheiñ mano mano ba ïoh ïa ka ram.“Ngim sngewkhia ia ka ram, hynrei kaba kongsan ka long ban pynthikna ba ki skhim pynroi kin poi sha ki briew ba dei hok ym sha kiwei pat”, ula bynrap.Ka BJP ka angnud ban bteng ban pyntreikam ia ki skhim pynroi na ka bynta ka jingmyntoi jong ki paidbah ka jylla