Nga ioh khubor ha Whattsap ba shah pynhiar shuki: Ampareen

Ka Myntri barim kaba khmih ia ka tnad ka koit ka khiah ka kong Ampareem Lyngdoh ka la ong ba ka jingshah pynhap shuki jong ka, la shu leh lyndet khlem don ka jingsyllok ne ka jingkynjoh ktien ia ka.Haba kren sha ki lad pathai khubor ka kong Ampareen ka la ong, ba ka jingbym don bynta ha ka jingpynbam smai ia ki Myntri dang shen, ka dei namar ba ym shym la khot ia ka.Ka la kam ba ka party ka la leh lyndet namar ba ha ka por ba ki khot ia ka ban iakhun ia ka ilekshon na ka party na East Shillong, ki nongtrei ka party ki da wan haduh haiing ban iasyllok hynrei haba pynhap shuki, ki la shu phah tang da ka shithi.

Ka la ong ka jingbujli shuki ka dei ka hok jong u Myntri Rangbah, hynrei ka la pynpaw ka jingsngew lyngngoh namar ba u Myntri Rangbah u khlem kynjoh ktien eiei shuwa ban pynhap shuki ia ka bad ki la shu phah da ka shithi bad kam shym la ioh ban pule namar ka jingdon bun ki shithi.“ Kim shym la khot eiei ia nga namar kane ka daw ngam shym la poi sha katei ka jingialang pynbam smai. Ka party ka la shu leh lyndet khlem kano kano ka jingiasyllok hynrei ka la shu phah ka shithi ha kaba na ka liang jong ka kam shym la pule namar ki don shibun ki shithi,” ka la ong.

Ha kaba ia dei bad ka jingshah weng noh na ka shuki Myntri, ka Kong Ampareen ka la ong ban iakren la sngew lehrain, hynrei kan sa leit ban iakynduh ia u Myntri Rangbah ban pan jingshai ha kano ka nongrim ba la weng noh ia ka.Ka la ong ba ka la kylli na u Myntri Rangbah ha ka por ba ka don ka jingialang sngewlem ha Party Office ba donkam ne em ba kan leit sha ka jingialang ha Delhi jong baroh ki Myntri Jong ka tnad Agriculture bad u Myntri Rangbah ula ong, ba ka hap ban leit khnang. Hynrei ha ka sngi ba bud ka ioh ka Message ha Whattsap ba la weng ia ka na ka shuki kam banse ban pep noh sha ka jingialang ha Delhi.