Nga pyniasoh NPP dei na ka longiing ba die syntiew ba kamai da ki klur: Ronnie V Lyngdoh

Ki nongialam ka seng National People’s Party (NPP) hynne ka sngi, ki la pdiang burom ia u MLA ka seng Congress na Mylliem Constituency u Bah Ronnie V Lyngdoh ryngkat bad ki nongialam bad ki nongkyrshan kiba la wan pyniasoh noh sha ka seng NPP.Ia u Bah Ronnie V Lyngdoh ryngkat ki nongkitkam bad ki nongkyrshan, la pdiang sngewbha sha ka seng NPP da u National President ka NPP u Conrad K Sangma ryngkat bad u President ka NPP Meghalaya u Bah Prestone Tynsong, ha ka jingialang kaba la long ha ka iingsah jong u Myntri Rangbah ka Jylla. Ha kane ka jingialang pdiang sngewbha ia u MLA ka Congress sha ka NPP la iadonlang u Lamphang ka iing dorbar thawain ka jylla u Thomas Sangma, ki Myntri Sorkar, ki MLA bad MDC ka seng NPP, u nongialam ka NPP uba long ruh u MLA barim ka Mylliem u Bah Hamletson Dohling, u State Treasurer ka NPP u Bah Daniel Thangkiew uba dei ruh u Officer on Special Duty (OSD) jong u Myntri Rangbah ka jylla bad kiwei kiwei.

Na kane ka jingwan pyniasoh u Bah Ronnie Lyngdoh, kumta ka NPP mynta ka la don 33 ngut ki MLA hapoh ka iingdorbar thawain ka jylla.Haba kren ha ka jingialang u Bah Ronnie ula ong, ba ka jingpyniasoh sha ka NPP ka dei hadien ba ula iasyllok bha bad ki nongialam bad ki nongkyrshan bad ula pynpaw ruh ia ka jingsngewnguh ia ki nongialam ka NPP kiba la pdiang ia u, ki nongialam bad ia ki nongkyrshan jong u sha ka seng NPP. Ula ong kawei na ki daw kaba la pynlong ia u ban pyniasoh bad ka NPP ka dei ha ka jingsakhi ia kawei ka iing kaba la die syntiew ha kaba ki la sdang ia kane ka kam da shi lak tyngka, hynrei mynta ki la kamai haduh shiklur tyngka lyngba ka Floriculture Mission jong ka sorkar jylla hapoh ka jingialam jong u Myntri Rangbah ka jylla u Conrad K Sangma bad ka sorkar mynta ka la rai ban mang T.240 Klur na ka bynta ki 3 snem ban wan ha ka kam rep syntiew bad kaba kham sngewtynnad ka long ba kane ka kam rep syntiew ka dei hi hapoh jong ka Mylliem Constituency. Ula ong, ba watla u Bah Ronnie ula mih noh na ka seng Congress bad pyniasoh sha ka seng NPP hynrei un iai long beit kum u juh u briew hynrei ka jingiapher ka long tang ka jingphong noh da kawei pat ka uniphom hynrei un iai bteng ban trei shitom na ka bynta ka bha ka miat jong ki paidbah khamtam ban wanrah ia ki kam pynroi bapher bapher.

U Bah Prestone Tynsong ula ong ba ka jingwan pyniasoh u Bah Ronnie ka dei namar ka kam pynroi, da ka jingieid bad ka jingkyrshan jong ki paidbah bad ula kular ruh ba ia ka jingshna ia ka surok Four Lane na Mylliem sha Umshyrpi yn sa pyndep noh hapoh u Bnai Nohprah.Katba u National President ka NPP u Conrad Sangma ula ong ba ka jingpyniasoh jong u Bah Ronnie kan nang pynkhlain ia ka seng NPP bad kan wanrah ruh ia ka jingkylla.“Kumba ki ju ong ha ka politik, ym ju don u paralok uba shirta bad u nongshun uba shirta hynrei kaei kaba long shirta ia ngi ka dei ka jingdon ia ka jingkular na ka bynta ki paidbah, ka jylla bad ka ri” ong u Conrad bad ka bynrap ba kadei kane kaba pynlong ia ki ban jam shaphrang. Nalor kane ula iaroh ruh ia baroh ki nongialam jong ka seng kiba kynthup ia u Hamletson Dohling u MLA barim ka Mylliem, uba la pyrkhat jngai ia ka jingkongsan jong ka roi ka par ban ia ka jingiasngew shimet ne ka jingiapher jingmut.  Ula ong ba watla ka sorkar jylla ka la mad ia kiba bun ki jingkynthoh hynrei kam shym la pynsngap satia hynrei ka la iai bteng ban trei shitom na ka bynta ka bha ka miat bad ka bit ka biang jong ki paidbah ka jylla.