Nga wanphai sha ka Congress ban ai shakri hok ia ki paidbah : Zenith M Sangma

U MLA barim ka Rangsakona u Zenith M Sangma ula ong ba ka jingmih jong u na ka Trinamool Congress ka dei namar ba ula don ha ka Congress naduh ba u dang khynnah bad u ieid palat ia kane ka party. Kum ban shu pynkynmaw ba u Zenith ula phet na ka Congress shwa ka ilekshon 2023 ban leit iasoh sha ka Trinamool Congress. Haba kren sha ki lad pathai khubor, u Zenith ula ong ba naduh ba u dang don ha ka rta 12 ne 13 snem udei uba khih ba ksar bha ha ka kam sain hima sima bad u juh u jan ha ka Congress party, hynrei namar katto katne ki daw ula hap ban jngai noh shipor na ka Congress bad ha kitei ki por ba u mih na ka Congress ula don ruh ka jingbabe.

“Namarkata mynta nga la rai ba wan iasoh biang sha ka Congress namar ba ka dei ka rynsan kaba biang ia nga ban ai ka jingshakri ba paka sha u paidbah,” ong u Zenith.U la ong ba ula wan phai biang sha ka Congress khlem kano kano ka kyndon bad un long u shipai ka party ban shakri ia ki paidbah. U Zenith ula ong ba ha ka politik na ka bynta ban ai ka jingshakri ia ki paidbah, kam don eiei ka jingong ban shet kylla ia ka iing ka sem.

Haba kylli la u Dr Mukul un wan ban iasoh lang bad u sha ka Congress, u Zenith ula ong ba u Dr Mukul u dei u nongialam ba la san bha ha ka politik, uba don shibun ka jingtip ka jingshemphang hynrei ia ka jingpyrkhat jong u, um lah ban tip bad kan bha ban kylli hi na u, la un wan ne em sha ka Congress. “Watla u dei u hymmen, ngam tip ia ka jingmut u Dr. Mukul, kan bha ba phin kylli na u, la wan phai ne em sha ka Congress,” ong u Zenith.