Ngam pat ju lap ki briew kin shah tan snam ha ki Menshohnoh, ong u SP

U Superintendent of Police (SP) ka East Khasi Hill District u Bah Vivek Syiem ula ïathuh ba ki Pulit ki dang pynlong ka jingtohkit bad ki dang ap ruh ia ka kaiphod jong ka Post Mortem halor ka jingshah pyniap u heprit 7 snem ka rta na Nongrah Lummyrboh. Haba kren sha ki lad pathai khubor u Bah Vivek ula ïathuh ba don ki dak mynsaw ha ka met u heprit kaba lah ban dei ha lane shwa ka jingshah pynïap. Ula ong haduh mynta ym pat lah ban tip, ha kano ka rukom bad kumno u heprit ula khlad bad ïa kane yn sa tip hadien ba la ioh ia ka kaiphod jong ka Post Mortem.

“Ngi dang pynlong ka jingtohkit bad ngim pat tip ia ka daw ba shah pynïap u heprit hynrei haba ki lanot ki dei ki heprit bun sien ka daw ka ju dei ba ki kwah pisa ne ba ki thmu ban leh sniew. Hynrei haduh mynta ngim pat lah ban ong eiei namar ngim pat ioh ia ka kaiphod jong ka Post Mortem” la ong u Bah Vivek. Halor ka jingkynnoh lah ban dei ki menshohnoh ba pynïap briew, u SP ula ong, “Ngam pat ju lap ha ka kam ba nga la trei ban don ki briew ki ba shah tan snam ha ki menshohnoh namar haba tohkit bniah ka mih da kiwei ki daw”. Haba ia dei bad ka jingshah pynïap i heprit Insaphira Lyngdoh Mawnai, u SP ula ïathuh ba ia ka kam pynïap la leh hi da u khynnah 13 snem da kaba pynngam jyllop ha um. “Halor kane ki pulit ki dang bteng ia ka jingtohkit kaba ngi la ioh ban kem ia u khynnah 13 snem ba donkti ban leh ia kane ka kam sniew bad kumba la paw ka jingkhlad ine i heprit  ka dei na ka jingngam ha um bad ha ka jingtohkit ka SIT u khynnah ula iathuh ba u dei ma u, uba  la pynngam ia ine i heprit bad kane ka dei namar ba ki iaknieh jingbam (Biskit)” la ong u SP. U SP ula ïathuh na ka liang ka SIT kan dang tohkit bniah ban tip shisha, la kane ka jingpyniap ïa I heprit ka dei na ka  jingbitar ba iaknieh jingbam, ne namar ba u khynnah 13 snem u thmu ban leh ki kam sniew.