Ngim ai Trading License thymmai, lada ki trai shnong ki lah ban trei ka kam: CEM

U Chief Executive Member ka Khasi Hills Autonomous District Council u Bah Shemborlang Rynjah, ula ong ba ka Executive Committee kan ym ai Trading License ia ki bar jylla ia ka kam ba lah ban trei da ki Khasi bad yn wanrah ruh ia ka polisi thungkam thungjam hapoh ka District Council.“Ngin ym ai Trading License thymmai ia kino kino ki kam ba ki Khasi ki lah ban trei. Kata ka dei kaba ngi buh hakhmat ha ka thong jongi bad ngin peit ia ki lad ki lynti ba ngin lah ban pynbeit ryntih katkum ka lynti ba dei, khnang ba ki samla ki jong ngi kiba angnud bad ieng ha la ki jong ki kjat kin ym duh jingkyrmen” la ong u Bah Shemborlang hadien ba ula shimti ia ka shuki CEM. Ula ong, “Ka ain ka la don lypa kumta ngin bud ryntih ia kata ka ain bad la ka dei ia ngi ruh ba ngin nang pynskhem bad pynbha khnang ba ngin ioh ia ka jingangnud ka jong ngi”. “Ngi angnud ban wanrah ia ka polisi thungkam thungjam, ha ka jingpeit ka jong ngi bad na ka liang ka jong nga, ngi lah iohi bad nga i sheptieng hynrei ngan dang khmih bniah bha ia kane. Ngi sheptieng ioh ka Council ka don ha kata ‘Disguised Employment’ ne ka jingbun ki nongtrei ban ia ka kam ba don. Ngin peit bniah bad ngin leh kloi ban don ia ka polisi thungkam khnang ba kan long ryntih bad kino kino ba rung hapoh ka ophis District Council kan long kaba beit khnang ba ki khun samla ba dei hok kin ioh bad kan ym long lymmuh ka thungkam thung jam” la ong u CEM.

U la ong, ka kam kaba hakhmat eh ka long ban pynbeit ryntih ia ka rukom treikam jong ka District Council bad kadei kaei kaei kaba ki angnud da kane ka EC bathymmai bad ka EC kan khmih ruh ia ki jingud jingnam ha kaba iadei bad ka Building Byelaw jong ka Council bad kumta kin ialeh ban pynbeit ryntih ia kane ka kam ba kan ym don ka jingpynwit ne jingthlia ia ki paidbah ne ia ki longiing longsem kiba duk ban thaw ia la ki iing ki sem ki jongki katkum ka jing kot bor ka jongki.“Ngin peit ryntih ia kane, ngi lah don ia ka ain, ai ba ka ain pat kan ym long ka jingpynduh jingkyrmen kaban pyndik, pynkthakhlieh ia ki longiing longsem kiba angnud ban thaw ia ki iing. Hynrei lyngba ka Building Byelaw, ngin peit pat haba ki thaw iing thaw sem kam dei pat ban ktah ia ka mei mariang, ban ym pynjakhlia ia ka umbam umdih. Ngin hap ban peit bha ruh ia ki jingtei kiba dei ki Commercial khnang ba kan ym wanrah pat ia ka jingma hadien habud” la ong u CEM. U CEM ula ong ba kin phaikhmat ruh sha ka khappud ha kaban yn pynbeit kyrpang ia ki jaka jong ki brew kiba sah ha khappud bad ban peit ia ki lad ki lynti ban ai ia ka jingshngain bad yn phaikhmat ruh na ka bynta ka mei mariang ba kan long kaba seisoh bad kaba pyngngad bad kaba ngi lah ban im ryngkat ryngkat bad ka mei mariang.

Halor ka jingkylli ha kano ka dur ka EC kan lah ban treikam bha lada kam don iaka jingiadei kaba iajan bad ka sorkar jylla kaba ialam da ka NPP, u CEM bathymmai ka KHADC ula ong, “Tang namar ba hapoh ka sorkar jylla ka don da kawei ka seng sain pyrthei bad ka EC ha District Council kadei kaba don da kawei pat ka seng sain pyrthei bad nangtai kin shu leh kat kaba mon. Hynrei nangtai pynban haba ki iohi ba kadei ka VPP kaba lah ban leh khambha hapoh ka Council, ioh ka ai pynban shibun ka jingkyrshan bad (nuksa) baroh shi katta kala pyllait tang T.10 hynrei lyngba ka jingwan ka jong ngi mynta kan pyllait pynban T.100, lehse ngi khmih lynti ia kata kein bad ngin ym khmih lynti eiei ia kaba sniew na ki, namar ma ki ruh ki shong hapoh shuki na ka bynta u paidbah bad lada ki leh ia kaei kaei, u paidbah hi yn bishar”.