Niah thuk thuk ki kynthei ha Jowai ha ka ‘International Women’s Day

Kum shibynta ka jinglehkmen ia ka International Women’s Day ka District Hub For Empowerment of Women ryngkat ka jingtreilang ka West Jaiñtia Hills District Police mynta ka sngi ki la pynlong ia ka rally ñiah thuk thuk ne ar shaka ha Jowai ba la sdang na phyllaw ka District Library Mynthong bad shwa ban iaid la kaweh lama da ka C. Lyngdoh Add Dy SP West Jaiñtia Hills bad pynkut pat ha Madan Wahriong Mihmyntdu. Ha kane ka rally ñiah thuk thuk ki kynthei ruh ki la ia mih ryntih ban pyndonburom iaka sngi ba kyrpang jong ki ryngkat ka jingsynran lang ki shynrang. Bad lynter lynti lyngba ka tyndong jingsawa kila pynsngewthuh ruh iaka bor bala pynkup haki kynthei khynnah bad longkmie haka imlang sahlang. Ka kong C. Lyngdoh ka ong  kane ka sngi International Women’s Day dei ruh ka sngi ban kynmaw burom ia ka bor jingkhlaiñ, ka jingjop jong ki ia kino kino ki jingeh ha ka jingiaid lynti jong ki kynthei kylleng ka pyrthei.

Ka ong ruh ba haba iohi ia ki kam ba jop ki riew kynthei, donkam ruh ban sngewthuh ia ki jingeh bapher bapher ba ki iaid lynti ha ka jingim. Haba bynrap halor ka jingpynkupbor iaki kynthei ka ong ba ka hok jong ki kynthei dei ka hok longbriew manbriew, bad ka kynthei ka don iaka bynta ba kongsan ymtang ha ïing kum ka kmie, kum ka lok, kum ka khun, hynrei ka long ruh u rishot bah jong ka jingiaid shakhmat ka imlang sahlang. Bad ka jingshim bynta kiba bun ki kynthei ha kane ka rally ñiah ar shaka ka pyni iaka jingiaid shakhmat ba ki kynthei ruh ki lah ban ñiah ar shaka, ñiah kali bad ruh ban ñiah liengsuiñ. Ka kyntu ruh ia baroh ban ai mynsiem shuh shuh iaki kynthei ha kano kano ka kam ba ki trei.

Kiwei pat ba ai jingkren kynthup ka S. Lakiang BBBP Ambassador, District Hub for empowerment of Women, u S. Maner, O.C Jowai Police Station, kong R. Ryngkhlem, President Iasnohktilang V.O Mihmyntdu haka jingialang lyngkot ba pyniaid daka Yoohi Kyndait, Gender Specialist, District Hub for Empowerment of Women, Jowai. La donlang ruh ha kane ka sngi ka I. Kharpran. O.C Jowai Women Police Station, kong L. Ksoo Centre Manager cum Protection Officer One Stop Centre, u F. Rynnga, District Mission Coordinator, District Hub for Empowerment of Women, Jowai, kong Y. Najiar, District Social Welfare Officer, Jowai bad kiwei.