Noh ka trok sha ka riat ha Jirang, khlad hashen 4 ngut

Saw ngut ki Rangbah briew ki la khlad noh hashen hadien ba kawei ka trok kaba ki shong ka la kylla bad hap shapoh ka riat kaba don kumba 200 meter ha ka shnong Mynnar Jirang, Ri Bhoi District.Katkum ka jingtip ba la iohlum, la iathuh ba katei ka jingjia kaba sngewsih ha kaba kawei ka trok fourwheel kaba la kit dieng na kawei ka khlaw katba ka dang thmu ban leit phai sha ka jaka ot dieng ka la kylla bad noh sha kawei ka riat kaba jylliew palat 200 meter ha kaba saw ngut ki briew kiba shong ha katei ka trok ki la khlad noh hashen.

La ioh jingtip, kine ki saw ngut kiba la khlad noh ki dei kiba la ithuh kyrteng kum u Edward Nongkhlaw, Teilor Nongphlang bad u Francis Warjri kiba shong basah ha ka shnong Iewsohksang bad u wei pat la tip kyrteng kum u Bankerlang Khyllaing na ka shnong Centre Village Jirang, katba u wei pat u ba la mynsaw jur bad dang shah sumar ha Civil Hospital, Shillong la tip kyrteng kum u Benedic Syiem. Na ka liang ki bor pulit ka Patharkhmah Police Station ki la rah noh ia ka met jong kine ki saw ngut sha Nongpoh Civil Hospital ban pyndep ia kaba donkam, ha kaba ki ba haiing hasem ki la poi lang ban shimti noh ban leh ia kaba donkam.

Halor kane ka jingjia, u Bah Sosthenes Sohtun MLA ka Jirang Konstituensi u la poi lang ha Nongpoh Civil Hospital ban pynpaw ia ka jingsngewlem bad ban kyrpad na ki bor ka ain ban pynlait noh ia ka post mortem khnang ba ki ba haiing ha sem kin lah ban shimti noh bad ban pyndep ia ka lehniam ba khatduh.