Noh syniang ka FKJGP da ki ben, ha ka sngi plie tamasa ialehkai ka skul Sati Raja

Kum ka jingkyrshan lem ia ka shlem ai jinghikai, ka Sati Raja Memorial Secondary School, na ka liang ka Federation of Khasi Jaintia and Garo People’s (FKJGP), Umsning Circle, ha ka Sngi Balang ka la leit ban ai sngewbha da ki ben shong sha kane ka skul ha kaba la aiti ia kine ki ben ha ka sngi plie pyrda ia ka Annual Sport Meet 2025 kaba lai sngi lynter. Ia kine ki ben shong ha ryngkat ki umsoh la aiti sha ka Kong Balakyntiew Umbah, Headmistress ka Sati Raja Memorial SS, lyngba u President ka FKJGP Umsning Circle u samla Gabriel Sunn u ba la shimbynta ruh kum u kongsan ban plie pyrda ia ka lympung ialehkai sport ha ka jingiadonlang u samla Steve Wahlang, General Secretary nalor kiwei kiwei ki dkhot.

Haba kren ha kane ka sngi kum u kongsan, u samla Gabriel Sunn, u la pynpaw ia ka jingkmen ban sakhilang ia ka jingsdang ka lympung ialehkai sport kaba dei ruh kawei na ki rynsan ban ailad ia ki khynnah pule ban pyni ia la ki sap ki phong ba ki don ha ka kam ialehkai sport ymtang ba kin shu pynlut ia ka por ha ki saw kynroh jong ki kamra klass ban ioh ia ka jingnang jingstad. Ula ong ruh, ba ka juk ba mynta lei ka kam ialehkai sport ka la dei ruh ka lad iohkam iohjam na bynta kito kiba don shisha ia ka sap ialehkai bad kiba pyndonkam hok ia ka ha kaba bun na ki rang ne ki thei ialehkai ba paw kane ka jylla ki lah ban im jakpoh na ki kam ialehkai bad ruh wat ban bsa ia la ki iing ki sem, da kaba kyntu ruh ba kum ki khynnah pule kim dei pat ban klet ia la ka jingpule khnang ba kin long briew manbriew ha ka lawei ka jong ki.

La sdang ia kane ka lympung ialehkai da ka March pass ba la shimbynta da ki khynnah skul kiba la mihkhmat na ki house bapher bapher, nangta ka jingthang ia ka sharak ban bam smai ruh ban bud thik ia ki kyndon ialehkai sport. Na ka liang ka FKJGP, Umsning Circle nalor ba la aiti ia ki ben shong ki la ioh ruh ban ai sngewbha da ki umsoh sha ki khynnah skul kum ka jingpyntngen ia ki ha ka jingiashimbynta ha kane ka lympung ialehkai sport.