Pahuh ki tyndong lyer shet, ki paidbah kim dei ban syier mynsiem, ong u Myntri

U Myntri ka tnat Food Civil Supplies and Consumer Affairs u Bah Methodius Dkhar hynne ka sngi u la pynthikna ba ka Jylla ka pahuh ka jingdon ki tyndong lyer shet (Cylinder) bad ka Sorkar kan leh da ka tyngeh pyrshah ïa kino kino kiba die tuh, pynkiew dor bad buh rieh ia ki Cylinder wat haba ki heh Sorkar ha Garo Hills ki dang ïaleh ban pynphai biang ïa ki jingpynpoi marbam mardih bad ki mar ba donkam hadien ba mih ka jingiakynad.

“Haduh mynta ngi pahuh ka mar bad ka Sorkar ka la pyntreikam ïa ka State Level Committee hapoh ka jingïalam u Chief Secretary ban buddien ïa ka jingdon ki tyndong lyer shet LPG Cylinder bad ka jingsam man la ka sngi” la ong u Bah Methodious hadien ba u la pynlong ïa ka jingïalang bishar bniah.

“Ka jingpynbiang tyndong lyer shet (LPG Cylinder) hapoh ka ri na ka bynta ki longïing ka dang long kaba hakhmat eh bad nga kwah ban kyrpad sha baroh ki nong shong shnong ba kan nym don kano kano ka daw jong ka jingsyier ha ki nongthied” u la ong haba pyntip ba la buh hakhmat eh ruh ban pynthikna ban pynpoi sha ki jaka ba kongsan kum ki hospital, ki hostel bad ki anganwadi centre.

U Myntri ula maham ba ka jingthied palat pud ne ka nongkhaii sha kiwei pat ki jaka iaki Cylinder kan wanrah ïa ka jingpynshitom katkum ka aiñ Essential Commodities Act bad u la kyntu ïa ki longïing ba kim dei ban don ka jingsyier ioh ki duh Cylinder.

“Yn shim bad pyntreikam da ki kyndon kiba tyngeh pyrshah ia ka jingthied palat pud, na ka jingdie ne die rem dor ia ki tyndong LPG Cylinder katkum ka ain Essential Commodities Act” ula ong.

Na ka liang u President ka Khasi-Pnar Gas Agency u Bah RL Blah ula iathuh ka dor tyndong lyer shet (Cylinder) kaba khia 14.2kg ka dei T.1,005 kata (T.980+T.25 ka bai kit) bad ula ong ba ka jingdon ki tyndong lyer shet hapoh ka jylla Meghalaya ka la biang haduh ka 21 tarik u Lber.

U Bah Blah u iathuh ruh ba ka Sorkar ka la pynbiang bor pahara ban bud ia ki kali kit tyndong lyer shet (Cylinder) ban pynpoi sha Garo Hills bad ba la wankit ruh ïa ki Cylinder kiba heh 19kg ban pynpoi sha ki Home Stay, Hostel, Hospital bad ki jaka ba kongsan.