Palat 100 klur ki skhim pynroi plie mawnongrim Sñiawbhalang ha Nartiang

U Sñiawbhalang Dhar symbud myntri ka sorkar Jylla haka 30/11/2024 haka por ba u plie paidbah iaka ML72 Rising Society kaba la seng halor ka nongrim ban kyntiew ia ki riew don sap ka thaiñ ha ki rukom bapher bapher, ha kane ka sngi ula plie ruh ki maw nongrim  kam pynroi hapoh ka Nartiang Constituency kiba la kynjoh palat  100 klur tam, ha kaba tang ka project shna surok kala kot 100 klur kynthup ki sarok ban shna thymmai bad ki ban shna pynheh  pynbha  ia kiba la don shwa batip kum ka Construction/improvement of U.N Road, Pdeiñ Mukhim, Sohphoh Mookabeng & Kdohkule Road. Kumjuh ruh ki kam pynroi hapoh ka shnong Wahiajer, West Jaiñtia Hills District lyngba ka tnat Tourism kiba la kynjoh sha ka 2 klur tyngka. Nangta ha kane ka sngi la pyllait paidbah ruh iaka Ambulance naka bynta ka Multi Sports Complex Management Development Society, Wahiajer khnang ban suk ioh pyndonkam haba don kano kano  ka lympung ialehkai khamtam nangne shakhmat haba don ka lympung ialehkai  MSL. Ha kane ka sngi plie maw nongrim bala pynlong ha Pdeiñ Mukhim Wahiajer, u Wailadmiki Shylla  Chairman ka MUDA  ula long kum u symbud kongsan ha ka jingdonlang  u MLA ka Umroi u Damanbait Lamare, u M. Marbaniang Superintending Engineer ka tnat  Tourism ka sorkar Jylla, D. Langstang Chief Engineer PWD Roads ka sorkar Jylla, u H. Nengnong Executive Engineer PWD Roads Jowai Central Division, u M.K. Kharnaior Superintending Engineer PWD Roads Jowai Circle, ki MDC ka JHADC, kiwei pat ki heh ophisar nalor kiba shah khot sngewbha.

U Sñiawbhalang Dhar haba ai jingkren  ha kane ka sngi, nalor ba u pynshai ia kine ki project ba ula buh maw nongrim  ha kane ka sngi, ula pynkynmaw ruh ia kiwei pat ki project ne ki kam pynroi ba kham hakhmat duh ba ula wanrah  hapoh ka Nartiang Constituency hadien ba ula shah jied kum u nongmihkhmat, kiba ma u kum u nongmihkhmat u iohi jngai naka bynta u paidbah khnang ban kiew ki paidbah ka thaiñ haki liang baroh. Ha ka jingiadei pat bad ka Jylla hi baroh kawei u ong ba kane hi ka sorkar ka kham pynlut bun bha naka bynta ban kyntiew iaka kam jngohkai namar ka don iaka jingiohi jngai ba kane ka kam dei  kawei ka lad ba lah ban pynkiew iaka Jylla bad ki paidbah ruh ki lah ban ioh myntoi haki kam bapher bapher la kaba heh ne rit tam ruh. Bad halor ka jingdon ka Jylla iaka kabu ba lah ban  pynkiew iaki kam jngohkai, u ong ba ia kane la sakhi ruh lyngba ka jingwan tuid ki briew ba nabar shaki jaka ba itynnad ka Jylla.

Watla  katta ruh u ong don pat kiba kynnoh baka sorkar ka shu pynlut kai iaka pisa haka kam jngohkai.  Ha ka jingiadei bad ki lynti syngkieng u ong ba ka sorkar mynta kala peit ruh iaki jaka bym pat biang sarok khang ban pynpoi surok lut sha waroh ki shnong ki thaiñ namar ba u sarok dei u budlum ka roi ka par. Kumta u buh jingkyntu  ia ki paidbah ban iatreilang na ka bynta ka roi ka par, ym ban  iatan iwei i wei.