Palat 12.78 million ki wan shangkai ha NE

Kiew ka jingwan ki nongshangkai pyrthei na shabar Ri ha Meghalaya

Shillong, Nailur : Ka kaiphod jong ka India Tourism Data Compendium 2025 ka pyni ba ka Jylla Meghalaya ka la sakhi kham bun ka jingwan tuid ki nongshangkai pyrthei na bar Ri (International) ban ia ki nongwan shangkai pyrthei napoh ka Ri (National).

Ka kaiphod ka kdew ba ka thaiñ shatei lam mihngi (North East) ka dang ïai bteng ban khring ïa ki nongwan jngohkai pyrthei, wat la ka bhah jong ka ha ka Pie ha ka kaiphod India’s Domestic Tourism ka pyni ba ka rit.

Ha u snem 2024, ki 8 tylli ki jylla ba shatei lammihngi ki la khring ïa 12.78 million ngut ki nongwan shangkai pyrthei napoh ka Ri ka dei tang 0.43% na ka jingdon jong ki nongjngohkai pyrthei kiba 3,009 million ngut.

Haba ïa nujor, ka thaiñ Shathei Lammihngi ka la pdiang sngewbha ïa ki 244,000 ngut ki nongwan shangkai pyrthei nabar ri (International) kaba long 1.17% kaba dei ruh haduh lai shah.

Ka Meghalaya ka la paw kum kawei na ki Jylla kaba kiew bha ha ka jingwan ki nongwan shangkai pyrthei nabar ri, da kaba kiew haduh 15.4%.

Ka Meghalaya ka ioh nong bha na ka jingwan tuid ki nongwan shangkai pyrthei namar ia ka Jylla la tip na ki jingkieng jri, ki wahduid, bad ka kolshor Khasi ka jylla ka la nang pynshong nongrim ia lade kum ka jaka jngohkai pyrthei kaba don ha ka mariang bad ka kolshor.

Ki heh Sorkar ki kdew ba ki nongwan shangkai pyrthei nabar ri ki nang kham sngewtynnad ban wan sha Meghalaya namar ka jinglong ba kyrpang jong ka Jylla, ka jingitynnad jong ka mariang bad ki jaka jngohkai pyrthei ba la ïalam da ki paidbah.

Ka jylla ka la ioh ia ka jingkiew kaba 13.4% ha ki nongwan jngohkai pyrthei napoh ri.

Kane shisha ka dei ka khubor kaba bha hadien ka jingjia ha Sohra kaba la pynsniew dur ïa ka thain bad iaka Jylla baroh kawei.

Ki heh Sorkar ki la iathuh ba ka jingwan jngohkai pyrthei ha Sohra ka nang kiew watla dang shen la don ka jingpyrshang ban pynthohbria ia ka dur jong ka Jylla Meghalaya hadien ka jingshah pyniap jong uwei u nongjngohkai pyrthei na Indore.

La khmih lynti baka jingwan tuid ki nongwan shangkai pyrthei hapoh ka Jylla kan poi sha ka 20 lak ngut.

Ka ‘Travel Trends Report 2025‘ ba la pynmih da ka global travel app Skyscanner ka kdew ba ka nongbah Shillong ka dei tang ma ka ka nongbah na India kaba la paw ha katei ka thup na ki 10 tylli ki jaka na kylleng ka pyrthei.

Ka kaiphod ka long katkum ki jaka ba ki iohi ia ka jingkiew ha ka jingwad liengsuin hapdeng ka 1 tarik Kyllalyngkot 2024 bad ka 30 tarik u Jylliew 2024 na ka bynta ka jingleit jingwan ha baroh u snem 2024 haba ianujor bad kajuh ka por ha u snem 2023.

Ka Shillong ka la iohi ia ka jingkiew kaba 828% ka jingwad liengsuin.

Ka Skyscanner, ka kam ba ka dei ka ba nyngkong ha ka pyrthei, ha kaba ïadei bad ka leit ka wan, ha kaba palat 100 million ngut ki briew ha kylleng ka pyrthei, ki pyndonkam ïa ka app bad ka website man u bnai.

“La tip kum ka “Scotland of the East”, ka Shillong ka pynsngewtynnad ïa ki nongwan shangkai pyrthei da ki jaka ba itynnad jong ka, kynthup ïa ki lum ba jyrngam, ki wahduid, bad ki pung ba khuid na ka bynta ki nongwan shangkai pyrthei” ong ka kaiphod.

Ka Sorkar Meghalaya ka la mynjur ban buh 100 tylli ki ‘Public Convenience Facilities lane ki jaka pynsuk paidbah ha kylleng ka Jylla, da kaba pynleit jingmut ha kaba pynbha ïa ki jaka khnang ba ki nongwan shangkai pyrthei kin sngewtynnad.

Kane ka jingthmu ka long kum ka jubab ïa ka jingeh kaba la slem bha jong ka jingbym biang ki jingtei bad ki jingdonkam ba kongsan ha ka liang ka jngohkai pyrthei jong ka Jylla, ka jingeh kaba la khanglad ïa ka jinglah jong ka Meghalaya ban kiew stet ha ka kam nongjngohkai pyrthei.