Palat 15 snem sah khongreng ka Polytechnic Nongstoin ‘Pan jingshai ka FKJGP’

Ka jingpyntrei ia ka Polytechnic kaba don ha ka shnong Mawruhsyiar, Nongstoin ka la iaid mynta la palat 15 snem kata naduh u snem 2009 ba la mang tyngka ia ka, hynrei haduh mynta katei ka jaka pule kam pat lah ban treikam. Ïa katei ka jaka pule la bei tyngka da ka sorkar kmie lyngba ka Ministry of Human Resources Development (MHRC) bad la sakhi ba ia ka building la lah ban pyndep hynrei haduh mynta ka shu sah kumto khlem da lah ban pyntreikam.

Halor kane ka bynta, ka Federation of Khasi Jaintia and Garo People (FKJGP), West Khasi Hills District, ka la leit ban pan jingshai na u Deputy Commissioner ka West Khasi Hills District halor ka jingslem jong ka sorkar ban pyndep ia ka jingpyntrei ia ki bynta ba dang sah ha katei ka jaka pule. U Education Secretary ka FKJGP WKH u Bah Ananstar Peiñlang u la ong ba ki paidbah jong ka Dong ka thaiñ ki khmih lynti ba ka jingdon jong kane ka jaka pule, kan ai jingmyntoi shibun eh ia ki khun samla ka District bad kan long ruh ka jingkyrkhu khamtam ia ki khun baduk basuk ban ioh bteng ia ki jingpule ha kaba iadei bad kane ka lain.

U la ong ba ha ka jingiakynduh bad u DC, u la iathuh ba ka mang Pisa na ka sorkar kmie lyngba ka MHRD ka la kut bad kaba sah mynta ka dei sa ha ka sorkar jylla ba kan pyndep ia kaba sah baroh. Kumta ka seng ka  kyntu ia ka Sorkar jylla ban pyndep noh ia kane ka kam kham kloi.