Palat 3000 ki skul SSA, yn shimti ban pyniaid ka sorkar Jylla

Ki don 3332 tylli ki SSA School hapoh Meghalaya kiba la rai ban ai ti pyniaid noh ha ka Sorkar Jylla. Napdeng kine 3034 ki dei ki skul ba pyniaid da ki shnong lane ki Community School bad 298 tylli kidei ki skul shimet kiba ioh jingiarap na ka Sorkar (Private Aided School). Ia kane la pyntip da u president ka Meghalaya SSA School Association (MSSASA) u Bah Aristotle Rymbai hadien ka jingialang bad u Myntri Rangbah ka Jylla u Conrad K Sangma ha ka jingdonlang u Myntri ka tnat Pule Puthi u Bah Lahkmen Rymbui ha ka jingdonlang ki ophisar ka tnat Pule Puthi.

Haba kren sha ki lad pathai khubor u Bah Aristotle ula pyntip ba ka jingialang ka long kaba seisoh namar u Myntri Rangbah ula kular ban iada ia ka hok jong baroh ki nonghikai SSA ha ka jylla Meghalaya. “Kumba phi tip ba ka jingbei pisa na ka bynta ki nonghikai SSA kan sa kut noh ha u snem 2026, ngi kmen ba u Myntri Rangbah ula kular ban iada ia ka kam nonghikai SSA” la ong u Bah Aristotle. U Bah Aristotle ula iathuh ba u Myntri Rangbah ula kular ruh ban pyntreikam noh da ka jingsiew bathymmai (Pay Structure) na ka bynta baroh ki nonghikai SSA bad ki 4th teachers, kaba long katkum ka jingdawa jong ki nonghikai baroh shikatta na ka bynta ka jingpynkiew ia ka tulop.

“Kum ba ong, ngi hun ia kane ka jingialang mynta ka sngi bad ka jingiakren ba bniah ngin sa pyntip paidbah ynda ngi la lah biang ban pynlong ia ka jingialang jong ki nonghikai ka ban long shen” ula ong.