Palat 4 hajar khring ka tamasa shet bam tynrai ia ki nongwankai ha Nanpolok

Ka tamasa kaba lai jong ka Culinary Cascade ban pyni ia ka shet bam tynrai ka jylla Meghalaya la pynkut noh hynne ka sngi ha nongbah Shillong ha Ward’s Lake.  Ha ki ar sngi jong kane ka tamasa, la don ka jingiaphylliew jingmut, ka jingpyni ia ki rukom shet, ka jingpynlait ia ki mar ba thung bad shna hi, bad ka jingiadei hapdeng ka bam, ka riti dustur bad ka imlang sahlang ban kyntiew ia ka nam ka kyrteng jong ka jylla.  Kane ka tamasa ka la khring haduh kumba 4,000 ngut ki nongwankai kiba la wan ban sakhi ha kine ki sngi ia ki rukom shet tynrai bad ki rukom shet mynta. Ha ka sngi kaba ar, ka la don ka jingiatai halor ka kam rep kam ri. Ka Dr. Madeline Tham kala pynshai halor ka jingiadei hapdeng ka bam bad ka kolshor.  U bah Kitdorlang Kharpran u Assistant Director ka Horticulture bad uba khmih ia ka Mushroom Development Centre, ula pynlong ka jingai jingmut halor ka jingrep tit bad ka lad ban ioh kam ioh jam lyngba kane.

U Myntri ka tnad kam jngohkai u Timothy D. Shira, Hon’ble Tourism haba kren ha kane ka sngi ula ong, “Ka Meghalaya ka dei ka jylla kaba bit ba biang ha ka jingdon ka mariang kynthup ki khlaw, ki wah, bad ka khyndew ka pynmih ia ki jait jingthung kiba kham niar ban shem bad kiba iadei bad ka jaitbynriew. Ka Culinary Cascade ka pyni ba ngi lah ban pynroi ia ka ioh ka kot ka jylla.”U la kdew ruh ba ha kine ki ar snem, lyngba kane ka tamasa, ki nongrep, ki karkhana bad ki nongshna kiad (winemakers) ki la iashim bynta ban pynpaw ia ka jylla ha kylleng ki jaka ka ri.“Kane kam dei tang ka riti dustur, hynrei ka dei ka ioh ka kot kaba dang san, kaba ka Sorkar Meghalaya ka angnud ban kyntiew,” ula ong.U la ban jur ruh halor ka jingiatreilang bad ki kynhun kum ka SEETI ban pynbit pynbiang ia ki khun samla ha ka rukom shet kaba iadei bad ka bam tynrai.

U la ong ba ki nongshet kum u New Year, IHM, Kong Dial Muktieh, bad Anjali Paul, kila pyni ia ka sap shet tynrai bad ka rukom shet mynta. Ka bynta kaba donkam ka dei ka SEETI Table kaba pyniasoh ia ki nongshet bad ki nongthoh khana ban iathuh khana shaphang ka bam tynrai ka Meghalaya.Katba u Dr. Shakil P. Ahammed, u Chief Secretary ka jylla, ula ong ba ka Culinary Cascade kam dei ka tamasa ba tang shisien hynrei ka dei ka lad ban kyntiew ia ka kam jngohkai ka jylla bad ka kam khaii sha ka pyrthei.Katba na ka liang ka kong Brenda Pakyntein, ka Director ka tnad kam jngohkai ka jylla,  ka la ong ba ka Culinary Cascade 2026 ka dei ka tamasa kaba lum lang ia baroh ia ki nongshet bad ki nongieit bam. Ia kane ka tamasa la pynshongshit ruh da ki  kynhun tem kum ka PHP, Syntung Music Band, bad Sur Na Nongkyndong.