Palat 50 ngut kem pang bad poi hospital ki khynnah skul JNV Rymbai suba dei ba sniew ki jingbam

Ka Jaiñtia Student’s Union Central Body hadien ka jingioh jingtip ba kiba bun ki khynnah skul ba pule ha Jawahar Navodaya Vidyalaya (JNV) Rymbai, East Jaiñtia Hills District kila ioh iaka jingpang prie pynhiar naduh ka 22 tarik mynta u bnai, ha kaba la don ruh ki khynnah bala poi Hospital, kumta haka 25/11/2025 hapoh ka jingialam u Bocheru Mi Pohsnem Education Secretary JSU Central Body  kala hiar sha katei ka skul. Haka jingleit hiar ka seng ban wad bniah iaka daw ryngkat ka jingdonlang u Food Safety Officer ka East Jaiñtia Hills, u Mardeng Diengdoh, la suba ba ka jingkem pang ki khynnah dei namar ba sniew ki jingbam bad ruh ka jingleh jakhlia. Kila lap ba ki jaka shet bad jaka ai jingbam iaki khynnah ka long kaba jakhlia bha, nalor bym don ki lad jingiada bad pynkhreh jingbam haka rukom ba khuid ba suba.

Ha kajuh ka por ki paiñkhana ba jakhlia ruh dei kiba don hajan ka jaka bam, kumjuh ka um bam umdih jongki ruh dei kaba  kylla rong saw bad bym  i biang ban  pyndonkam. Haba ka seng ka iakren ba uwei u khynnah uba dei u School Captain ha kane ka skul  u iathuh kumba long mynta  39 ngut ki khynnah ki khlem wan skul shuh naka daw ba ioh jingpang, bad tang hynnin ka 25/11/2025 la don palat 20 ngut kiba ioh jingpang haka por step. Ban pyntikna ia kane ka seng JSU kala leit sha Rymbai PHC ha kaba u Doctor ba dei peit ia kane ka hospital ruh ula pyntikna iaka jingdon kiba ioh jingpang prie pynhiar naka daw ka jingbam.

Ha kane ka sngi ka seng kala leit jurip ruh iaka iingskul building thymmai ba pura ka JNV Rymbai kaba dang iaid shakhmat ka jingtei, ka seng ka lap ba hapoh ka Phase A kaba la mang 50 klur, ka jingpyntrei bala dep ka long  95% tangba ym pat don bording ne ka um. Katba ka Phase B kaba mang 20 klur ka jingpyntrei ka dang long tang kumba 40% bad la buh  ban pyndep ha u bnai April 2026. Haka jingiakren ka seng bad u Principal ka JNV u iathuh bala pynkhreh ban pynkynriah noh shaka iingskul thymmai hapoh 15 sngi.