Palat 500 tylli ki skul ha Jylla kim pat ioh jingithuh na ka Sorkar

Ki don palat 500 tylli ki skul ha ka jylla Meghalaya ki bym pat ioh jingthuh ne hap hapoh ka Unified District Information System for Education (UDISE). Ia kane la pyntip da u Project Director ka SSA u Swapnil Tembe hadien ka Review Meeting ka tnat Pule Puthi. Haba kren sha ki lad pathai khubor u Swapnil Tembe ula iathuh ba ki 500 tylli ki skul kim don satia ha ka Unified District Information System for Education (UDISE) kaba dei ka kyndon jong ka Sorkar Pdeng ban ithuh ia kawei pa kawei ka skul hapoh ka Ri. U la ong, ka jingithuh ka mut ba ki skul ki donkam ban ioh ia kano kano ka jait kot na ki heh Sorkar ne na ka Sorkar ha shuwa ban pyntreikam.

“Ki don ka jait kot ba la pynmih da ka Sorkar ne ki heh Sorkar, kum ka nuksa ki skul Elementary Skul ki DSEO ki dei ban ai ia ka jingithuh. Ka lah ban long ka jingbit ban plie, ka lah ban long ka jingithuh ba shipor, ka lah ban long ka jingithuh ba neh hynrei namar ki jingleh mynshwa kine ki skul ki la treikam ha ka rukom treikam khlem ka jingithuh” la ong u Tembe. U la bynrap ba ka Sorkar India ka la bthah ia baroh ki Sorkar Jylla ba kin shimkhia ia kine ki skul bym pat ioh jingithuh. “Kumta ngi la bthah ia ki ophisar ban leit pynshisha la ki don ne em ia baroh ki jingdonkam ba kongsan khnang ba yn lah ban ai jingithuh” u la ong.

U Tembe ula ong ba ka tnat pule puthi kan sa pynmih shen ia ka rukom treikam (Standard Procedure) ba la buh ryntih na ka bynta baroh ki nongshim bynta ban bud shwa ban plie ia kano kano ka skul hapoh ka Jylla. “Lada don kiba kwah ban sdang ia ka skul ki hap ban pan jingbit, ki hap ban pyni ba ki hap ban donkam ia ki jingtei (Building) bad nangta yn sa ai ia ka jingbit ban plie, nangta ki lah ban sdang bad hadien lai snem lada ki leh bha, lada don ka jingpynrung kyrteng ki khynnah skul, te yn ai ia ka jingithuh ba neh ne ka Certificate jong ka jingithuh bad yn pynmih ia u UDISE code” u la ong.