Palat T.576 klur siew ka sorkar ia ki trai jaka ban shna surok Western Shillong By-Pass

Ka sorkar jylla ka la pyllut palat T.576 klur tyngka na bynta ban siew bai jaka sha ki trai jaka kiba hap ha Ri Bhoi bad East Khasi Hills na bynta ban shna ia ka surok Western Shillong By-Pass. U Symbud Myntri Rangbah ka jylla ubah Prestone Tynsong uba dei ruh u Myntri ba khmih ia ka tnad PWD (Road), ula pyntip ba ka sorkar jylla na bynta ban pyntrei ia kane ka project, katkum ka LARR ne RFCTLARR Act,2013, ka sorkar ka la siew T.121.40 klur tam sha ki trai jaka ha Ri Bhoi bad ha East Khasi Hills ka la siew T.455.39 klur. “Baroh ki trai jaka kila sngew hun ia ka jingsiew bai jaka lait noh tang katto katne kiba don ka jingiakam ia ka jaka,” ong u bah Prestone haba jubab ia ka jingkylli ba la wanrah da u Nongialam ka liang Pyrshah u Dr Mukul Sangma hynne ka sngi ha Iing Dorbar Thawain ka jylla.

U Dr. Mukul ula bynrap jingkylli hato ka sorkar ka la pynshisha ba ki don ki kynhun kiba la kynnoh ba ki trai jaka kim ioh ia ka bai jaka ne ka jingleh bakla. Halor kane, u bah Prestone ula kubur ba ka don kaba kum kane hynrei la bynshet ka bor district ban pynbeit ia kane ka kam. U la ong ba ka sorkar ka la shim jaka 97.5 percent bad kaba sah sa 2.5 percent dang shim khia ki bor district. Katba halor ka jingkylli bynrap jong u MLA ka Nongkrem u bah Ardent Basaiawmoit, u Symbud Myntri ula ong ba kam don kano kano ka jingpyndonkam bakla ia ka pisa ban siew bai jaka. U bah Prestone u la ong ba ula shu iohi ha ki lad pathai khubor ba ki don kiba shim percentage hynrei haduh mynta ka sorkar kam pat ioh kano kano ka jingujor ha ka sorkar. “Ka lah ban dei ba kim nang bha ban pyndap ia ki kot ki sla bad ki phah iarap ha ka jingiasngewthuh jong ki,” ula bynrap.

U la ong ba ki don ki jaka kiba iaknieh ban kam ba u dei u khlieh ka kur bad uwei pat u wan sa uwei uba kam bad kane ka la wanrah ka jingiakam hapdeng jong ki bad ka sorkar ka dang pynbeit bad ki. “Haba iadei bad ki jaka puta, kam don jingeh ban pyntrei ia ka project hynrei lait noh tang ki jingkam jaka markylliang ia ka jinglong trai,” ong u Symbud Myntri Rangbah ka jylla.