Palat T.7 klur la pynthymmai iaka skhim sam um bala shna naduh ki por ka Sorkar Phareng

U MLA ka South Shillong u Bah Sanbor Shullai hynne ka sngi u la plie paidbah ia ka skhim sam um ba la pynthymmai lane ka Additional Water Supply Scheme kaba dei naka bynta ki paidbah ka constituency. Ia ka Additional Water Supply Scheme la mang tyngka da ka AMRUT Atal Mission for Rejuvenation and Urban Transformation Central Scheme 2021-2032-2023-2024 bad ïa kane ka skhim la pyntrei lang da ka tnat PHE ka Sorkar Jylla bad ka Shillong Municipal Board (SMB) ha ka jingmang pisa kaba T.7,74,15,000. Ka Additional Water Supply Scheme kadei ban maramot lane pynbha iaka rukom sam um hapoh ka thaiñ Laban khamtam ha Madan Laban daka ba pyllait iaka um naka jaka pyllang um (Top) ba la shna ha ka por ba dang synshar ka Sorkar phareng ha u snem 1936.

Kane ka Top um bala shna naduh u snem 1936 kadei ban pyllang um ym duna 2.25 lak litar ban pynbiang um bam um dih sha ki nongshong shnong ka Laban bad Madan Laban nalor kiwei pat ki jaka ba marjan.Ha kane ka sngi u Bah Sanbor u la pyllait ïa ka um lyngba ki pipe thymmai haka jingdon lang ki Rangbah Shnong, paidbah nongshong shnong bad ki ophisar naka tnat PHE bad SMB.Haba kren ha kane ka sngi u Bah Sanbor u la ong ba ka jingpynthymmai ia ka jingsam um shaki paidbah ka kynthup ia ka jingbujli ia ki pipe kiba la rim ban pynpoi um shaki jaka pyllang um (Top) shaki shnong bapher bapher jong ka Laban khamtam ha Madan Laban.

“Nauh ki snem 2019-2020 nga la don jingmut ban pynthymmai ïa kane ka jaka pyllang um kaba la shna nauh ki por ba dang synshar ka Sorkar Phareng bad mynta kane ka project kala urlong naka bynta ka jingmyntoi ki paidbah jong ka constituency” la ong u Bah Sanbor.U Bah Sanbor u la ong ba kane ka Project kan long ka jingmyntoi iaki nong shong shnong namar ka thaiñ kala sakhi iaka jingnang roi ki iing ki sem kumjuh ruh ki Guest House, ki Hotel nalor ki ophis Sorkar bad riew shimet. U la ong ba ka jingpynthymmai ia ka top um bad ka jingsam um kan pynthikna ba kan nym don kano kano ka jingthut ha ka jingpynbiang um sha ki paidbah nongshong shnong.