Pan jingkyrshan ka MSPCB ban tei ophis ha Tura, Khliehriat bad Byrnihat

Ka Meghalaya State Pollution Control Board (MSPCB) ka la pan ka jingkyrshan na ka Sorkar Jylla ban tei 3 tylli ki Regional Office, kata ha Tura West Garo Hills, Khliehriat East Jaintia Hills and Byrnihat ha Ri-bhoi District. Ïa kane ka jingtyrwa la ïakren ha ka jingïalang bishar kam ba khlieh da u Myntri Rangbah ka Jylla u Conrad K Sangma ha ophis treikam ka MSPCB ha Lumpyngad, Shillong.Haba kren sha ki lad pathai khubor u Member Secretary ka MSPCB u Dr GH Chyrmang, ula ïathuh ba haduh mynta ka Board ka shem jingeh ban pynkhlain ia ki rukom treikam namar ka don ophis tang ha Shillong katba ki ophisar ki hap khmih ia ka Jylla Meghalaya baroh kawei.

U Dr GH Chyrmang ula ïathuh ba ban tei kawei ka ophis ka jinglut ym duna T.7 klur tang ka Building bad kumba T.8 haduh T.10 klur man u snem ban pyntreikam pura hadien ba biang lut ki nongtrei ba pura. “Ha ka jingïalang mynta ka sngi u Myntri Rangbah ula kular ban kyrshan ia ka MSPCB ban tei Regional Office ha Tura, Khliehriat bad Byrnihat. Ngi jied ïa kine ki jaka namar ki dei ki jaka ba bun ki jait karkhana” la ong u Dr GH Chyrmang. U Member Secretary ula ïathuh baka MSPCB ka don jaka ha Tura bad Khliehriat ban tei Regional Office. “Kaba eh ba ngim don jaka ha Byrnihat hynrei na ka liang u Myntri Rangbah ula bthah ba ka Board ka dei ban thoh sha ka Sorkar Jylla khnang ban wad ki lad lynti ban pynioh jaka ha Byrnihat ban tei Regional Office” u la ong.

U la ïathuh ruh ba ka MSPCB ka duna nongtrei bad ha ka jingïalang ka la ïakren sani ha kaba u Myntri Rangbah ula bthah ban pynkhreh da ka Action Plan khnang ban ïakren biang ha ka jingïalang ka ban long ha u bnai Kyllalyngkot, 2026.