Pan jingshai ka FKJGP na ki bor pyniaid Civil Hospital

Ka Federation of Khasi Jaintia and Garo People (FKJGP) hynne ka sngi ka la pan jingshai na ka Additional Director Health Services ka Dr A Kharjana hadien ba la ioh ka jingujor ba bun ki tiar ban eksamin ia ki nongpang ha Civil Hospital, Shillong kim pat treikam haduh mynta. Ka FKJGP ka la shim ia kane ka sienjam hadien ba la ioh ki jingujor na ki paidbah ba ki tiar eksamin kum ka MRI, ka tnat Psychology bad katto katne ki kor (Dialysis) Machine ha Shillong Civil Hospital kim pat treikam bad ki nongpang ki hab ban leit eksamin shabar.

 Haba kren sha ki lad pathai khubor u president ka FKJGP u Bah Dundee Khongsit u la iathuh ba ka Additional Director ka la iathuh ba ka MRI Machin ka la don naduh u snem 2018 hynrei namar ba ym don briew ia kane ka MRI machin ym pat lah ban pyntreikam. Haba ia dei bad ka tnat Psychology, u Bah Dundee ula iathuh ba ka tnat Psychology ka don hynrei namar ba la kynriah ia i Psychologist, sha Ganesh Dad Hospital, haduh mynta ka Shillong Civil Hospital kam pat ioh ia I Psychologist thymmai.

U la ong ba ki don ym duna 4-5 tylli ki Dialysis Machin hynrei ba duna jaka ban buh ia kine ki Machin, ka Hospital mynta ka don tang 4 tylli ki Dialysis Machin kiba treikam pura. “Ka koit ka khiah ka dei ka hok jong ki paidbah baroh. Ka Sorkar ka dei ban shimkhia halor ki jingduna hapoh kane ka Hospital ban iarap ia kiba pang ba shitom khamtam kito kiba wan na ki longiing ba duk kiba duna ka ioh ka kot” la ong u Bah Dundee. Nalor kane u President ka FKJGP u la pyntip ka seng kan shong jingialang ha ki sngi ban wan kan leit kynduh ia ki bor Sorkar ban dawa pynbit pynbiang ia ki jingdonkam ha baroh ki jaka sumar hapoh ka Jylla.