Pan jingshai ka VPP na u CEM ha jah rngai ki mawpud ‘Lawadong Mawpat

Ka Voice of the People Party (VPP) hynne ka sngi ka la phah shithi sha u Chief Executive Member (CEM) ka Khasi Hills Autonomous District Council (KHADC) ban pan jingshai la ka Council ka don jingtip halor ka jingjah rngai u maw nongrim na ka Law Adong ba don ha Mawpat bad ka jigpyntrei ia ki kam bapher bapher ha katei ka khlaw. Ka VPP ha kane ka sngi Hatmajai hapoh ka jingialam u bah Ardent Basaiawmoit, ka la pyllong ia ka jingleit jngoh ia ka Law Adong kaba don ha Mawpat bad ha katei ka jingjurip ka seng ka la pynpaw ia ka jinglyngngoh namar ba katei ka jaka ka la don shibun ki jingkylla bad la kynnoh ba la don ka jingtreikam buit tuh ha kaban die bad ban ai sngewbha ia ki jaka hapoh u pud u sam jong katei ka khlaw sha ki riewshimet bad ki nongmihkhmat.

 “Kaba kham pynlyngngoh bad pynsngewsih ia ngi ka long ba wat ia U Mawnongrim uba lah pynieng ban long kum u sakhi ha katei ka Khlaw hadien ba lah dep ban soi ia ka soskular hapdeng ka Hima Mylliem bad ka Khasi Hills Autonomous District Council ban pynkylla Law Adong noh ia ka ha ka 22 Jymmang 2014 u lah jah rngai noh,” ong ka kyrwoh khubor na u President ka State Youth Wing ka VPP u bah Marbud Dkhar bad ka President ka State Womwns Wing ka kong P. Syiem. Nalor kitei, ha ka jingjurip ia katei ka jaka, ka VPP ka la lap ba ym shym la sumar ia katei ka Law Adong ba wat ki jingker ruh kim don shuh bad la lap ruh ba lah ai jaka ia ka PHE bad la ai jaka ruh ban iaid lyngba ka surok napdeng katei katei ka khlaw ban mih sha New Shillong bad kiwei kiwei de ki ki jingpyntrei.

  “Hato ka Council ka don jingtip ne em shaphang ki jingpyntrei kam kiba pher ba pher kiba jia ha katei ka Law Adong bad lada ka District Council kam don jingtip eiei ngi kyrpad iaphi ba phin pan ia ki jingpynshai bad ka jubab na u Syiem ka Hima Mylliem khnang ba ka jingthmu ban pynneh ia katei ka khlaw kum ka Law Adong ka dei ban neh na ka bynta ka bit ka biang jong ki nongshong shnong bad khamtam eh ha kaba ia dei bad ka mariang,” ong ki nongialam ka VPP. La ong ba ka jing pynneh ruh ia katei ka Khlaw kum ka Law Adong kan long ruh ka jaka shong ia ki sim kiba lah sdang ban duna bad duh jait na ka daw ba ki khlaw kiba don hapoh sor bad khap sor ki lah sdang ban syllen na ka daw ka jingpom bad pyn khyllem ia ki dieng.