Pan jingshai ki longkmie na u DC bym ioh ration card ka thain Tyrso

Ki longkmie kiba la kot kumba spah ngut eiei kiba dei ruh na ka longiing baduk jong ka thain Tyrso, mynta ka sngi ki la hiar sha Nongpoh ban leit pan jingshai na u Deputy Commissioner ka Ri Bhoi District halor ka jingbym ioh jong ki ia ka ration card wat hadien ka jinglum khana samari (Census) jong u snem 2011. Ha kane ka jingleit ia kynduh ia u DC, na ka liang ka kynhun ki longkmie la lamkhmat da ka Kong Iohilut Lyngdoh bad kiwei kiwei kiba la dawa ia ka jingpynshai halor ka jingbym ioh ia ka bhah jong ka ration card bad ruh ban ioh bhah ia u khaw ration kumba iohlem kiwei kiwei ki longiing baduk. Haba kren sha ki Nongthoh Khubor hadien ka jingiakynduh ia u DC, ka Kong Iohilut Lyngdoh, da ka jingsngewkhia ka la iathuh, ba ka nongrim hi ba kum ki longkmie ki la hiar dalade ban wan pan jingshai na u DC namar ba tad haduh u ne u snem kim shem la shah kynthup ban ioh bhah ne shah kynthup ban ioh ia ka ration card ban ioh ia u khaw ration ba la mang da ka sorkar na bynta ki longiing baduk.

\Ka la iathuh ruh, ba kum ki longkmie kiba wan na ki longiing baduk ki dap da ka jingsngewlyngngoh, ba naduh ba la dep lum ia ka khana samari ne ka census jong u snem 2011, da ki spah ngut ki longkmie kim shem la ioh ia ka ration card kumba ki deihok hynrei kaba kham sngewkhia ka long ba ki don pat ki longiing kiba kham bit kham biang ki ioh ia ka jingbhah ia u khaw ration.

Haba pynshai halor katei ka jingwan mih jong ki longkmie ka thain Tyrso, u DC ka Ri Bhoi District, u Abhilash Baranwal u la iathuh, ba ki longkmie ki la wan ban buh jingkylli na u, ha kaba ia dei bad ka jingbym ioh ia ka ration card watla la dep ia ka jingpynrung kyrteng ia ki, da kaba ong, ba ka ophis jong u hi kam lah ban leh eiei halor kane namar ia kane ka bynta la leh hi da ki bor ka sorkar pdeng bad lada kam pat don kano kano ka jingpynrung kyrteng na ka liang ka ophis jong u kam donbor satia, watla katta na ka liang u DC un shimkhia ban buddien ia kane ka bynta kumba la ujor da kitei ki longkmie.