Pan jingshai u MDC Nongkrem halor ka shnong thymmai Mawsaw

U MDC ka Nongkrem Constituency u Bah Lambor Malngiang hynne ka sngi, ula pan jingshai halor ka jingpynkha thymmai ia ka shnong Mawsaw ba hap shiteng sha ka shnong Umphyrnai bad Ur Masi U Joh khlem da ioh shwa ia ka jingmynjur na ka shnong kmie. “Nga lah kren da kaba shai ia ki paralok ba ngan iaid shakhmat ban ia pynbeit ia kane ka kam namar mynta ka la kynthup ia ki saw tylli ki mamla, ka la takhuh hapdeng ki artylli ki shnong (Umphyrnai bad Ur Masi U Joh), ka Hima bad ka District Council” ong u Bah Lambor haba iakren bad ki nongthoh khubor hadien ka jingiakynduh ia u Chief Executive Member ka KHADC u Bah Pyniaid Sing Syiem ban pan jingshai halor ka nongrim pynmih shnong thymmai ia ka shnong Mawsaw ha Lad Smit.

“Kaba paw ha ka kyrteng ba la soi ka dei jong u Deputy CEM u Bah PN Syiem, bun sien ia ki hukum la pynmih da ki Joint Secretary ka Elaka ne ki ophisar katei ka tnad, hynrei ka long phylla ba ia ka jingmynjur bad ia ka hukum la paw da ka kyrteng jong u Bah PN Syiem” la ong u Bah Lambor. Ula bynrap ba u Syiem ka Hima Khyrim u Dr Balajied Sing Syiem um shym la ai ka jingbthah ban thaw shnong thymmai, hynrei la shu iaid beit bad ka Council kaba long pyrshah ia ki riti synshar ban iaid lait ia ki bor synshar hima. U Bah Lambor ula ong, ba u kwah ban pynbeit noh ia kane ka kynrum kynram ban wan rah ia ka jingsngewthuh hapoh ka shnong Umphyrnai bad Ur Masi U Joh.

“Ngan ap namar ki la pan por ban pynbeit, hynrei ngan sa ai biang sa kawei ka jingthoh, la ka long ba nga hap ban iaid ryngkat bad ki nongiasaid ain ban pynbeit ia kane ka kynrum kynram” la ong u MDC. Ula ong ba ka ju don ka jingphiah ia ki shnong ki thaw haba kala heh palat ka shnong hynrei udei ban don pat u pud ban ioh ia ka jingmynjur na ka shnong kmie shwa ban pynmih ne pynkha ia ki shnong khun bad kane ka dei ka rukom peit rukom khmih bad katkum ka Section 3 jongka Elaka Act ka kren shai ba hap ban ioh shwa ia ka jingithuh ne jingmynjur na ka shnong kmie.“Kum u MDC ka dei ka kam ram jong nga ban pynbeit haba don kum kine ki jingjia ha ki shnong ki thaw” la pynkut u Bah Lambor bad bynrap ba um pyrshah iano iano hynrei donkam ban iaid ha ka lynti ryngkat ka jingsgewthuh jingmut lang.