Paw ka skul Friendly Academy ba pass bha ki khynnah, ai jingiarap u MLA T.2 lak

Ban ai mynsiem shuh shuh ia la ki khynnah pule, ki bor pyniaid ka Friendly Academy Higher Secondary School, Umpyrdong, Umden, kaba la nang jam ruh sha u mawmer ba 20 snem ka jingshakri ban phriang ia ka jingnang jingstad, mynta ka sngi, ka la ioh ban pynkup burom ia ki khynnah pule kiba la pass bha ha ka eksam SSLC bad HSSLC, kane ka skul ka la paw ha ka eksam HSSLC na ka jingpass bha haduh 9 ngut.
Ha kane ka sngi sah jingkynmaw jong ka skul Friendly Academy HSS, la wan ban ai mynsiem da u Bah Mayralborn Syiem MLA ka nongpoh kum u kongsan, la ia donlang ruh ka kong S Shylla Principal, ki nonghikai, khynnah skul bad ki kmie ki kpa.
Haba kren ha katei ka jingialang naka liang u MLA ka Nongpoh u bah Mayralborn Syiem u la ai iaka jingiaroh ia kane ka skul ba wat tang haki khyndiat snem kane ka skul ka la lah ban pynmih shibun ki khynnah kiba stad bad kiba shemphang ha kaba bun na ki samla pule kiba la pass na kane ka skul ki la ioh ban ia trei ha ki tnad sorkar bapher bapher.
Ula ai jingiaroh ruh, ba kum kawei na ki shlem ai jinghikai ha ka thaiñ Umden, kane ka skul ka lah ban leh ia ka ba bha tam na ka bynta ban kyntiew iaka kam pule puthi hapoh kane ka thain wat hapdeng shibun ki mawsiang bad ki jingtynjuh ba ki bor pyniaid skul ki la hap ban mad ban kyntiew ia ka jingnang jingstad ban pynsahnam ruh ia u “Bah Friendly Manih”, Bam Kwai ha Dwar U Blei ia u ba la pynsahnam lyngba kane ka shlem ai jingnang jingstad.
“Ka jingmih ki khynnah pule kiba pass bha ha ka eksam SSLC bad HSSLC ka long ka jingai jingkyrmen kaba khraw ia ki nongpyniaid jong kane ka skul, bad kum ki samla pule ki dei ban nang iai treishitom haki jingpule jong ki khnang ba kin nang lah ban kiew shuh shuh sha ki kyrdan kiba kham shalor”, ong u Bah Syiem. Ha kane ka sngi, u MLA ka Nongpoh u la pynlait ia ka work order kaba 2 lak tyngka na ka SRWP skim 2023-24 sha ka skul ban pynbha ia ki kamra klas.