Pdiang ka JHADC ia ka jingtyrwa ka sorkar ban siew tulop ia ki nongtrei

U Chief Executive Member (CEM) ka Jaintia Hills Autonomous District Council (JHADC) u Bah Thombor Shiwat ula pynpaw ba ka District Council ka lah ban ban pdiang ia ka jingtyrwa ka Sorkar Jylla ban iarap siew tulop ia ki nongtrei hynrei kan long katkum ki kyndon. Ia kane u CEM ula iathuh hadien ka jingiakynduh ia u Symbud Myntri Rangbah uba khmih ia ka tnat District Council Affairs (DCA) u Bah Prestone Tynsong. Haba kren sha ki lad pathai khubor u CEM ula iathuh ba ki nongtrei ka JHADC kim pat ioh tulop kumba 6-7 bnai.

U Bah Thombor ula ong, ba ka JHADC ka lah ban pdiang ia ka jingtyrwa ka Sorkar Jylla ban iarap siew tulop ia ki nongtrei hynrei kan buh da ki kyndon hakhmat ka Sorkar. Ula ong ba kum kiwei ki District Council, ka JHADC ka don ia la ka bhah ne ka jingioh khajna na ka Sorkar Jylla (Royalty Share). “Kumta ngi donkam ia ka jingiarap ka Sorkar Jylla namar ngim lah ban shaniah tang ha ka jingmih ioh bhah khajna (Royalty Share) lane tang na ka jinglah ka JHADC ban lum khajna ban siew ia ka tulop ki nongtrei” la ong u Bah Thombor.

U CEM ula kdew ka Sorkar Jylla kam pat lah ban pyllait lut ia ka bhah khajna ba dei hok sha ki District Council khamtam sha ka JHADC. “Ngin dang hap ban peit kumno ngin pyniaid ia ka kam” u la ong. U la pyntip ka JHADC ka dang ap mynta ia ka sorkar Jylla ban khein ia ka bhah khajna ba dei ban ioh ka Council bad hadien ba la dep ioh ia ka jingkhein, ka Council kan rai ia kaba dei ban leh.