Pdiang sngewbha ka Congress ïa ki nongïalam UCPF ha Umroi

Ki nongialam ha ryngkat ki nongkyrshan ka Umroi Constituency Progressive Forum (UCPF) mynta ka sngi ki la pyntikna ban ai noh ia ka jingkyrshan kaba radbah ia u Bah MD Syiem, u kyrtong ka party Congress ha kane ka ileksion MDC kaban sa long shen, hadien ba ki la leit ban pyniasoh pura noh sha kane ka party, ha ka jingialang kaba la long ha Umroi, Ri Bhoi District. Ia ki nongialam ka UCPF, ba la lamkhmat da u Bah Pynskhem Sohtun, lem bad kiwei kiwei ki heh nongialam ha ryngkat ki nongkyrshan la pdiang sngewbha mynta ka sngi sha ka party Congress da u Bah P.N Syiem, Working President ka Meghalaya Pradesh Congress Committee, u Bah Standlywiss Rymbai, Adviser ka Ri Bhoi District Congress  Committee, u Bah M.G Kharshanlor, President ka RBDCC nalor kiwei kiwei ki heh nongialam ka party Congress. Lyngba kane ka jingialang paidbah, na ka liang ka kynhun jong ka Congress ka la ioh ban pynithuh ruh ia la ki kyrtong kiban aireng na ki 5 tylli ki Constituency ka Ri Bhoi District ha kane ka ileksion MDC kaban sa long shen da kaba pan ruh ia ka jingkyrshan na u paidbah na bynta kine ki kyrtong kiba kynthup ia u Bah Victor Rani na Jirang Konstituensi, u Bah Rocky A. Marwein na Umsning Konstituensi, u Bah Lawrence Nongrum na Nongpoh Kongstituensi, u Bah Dominic Mynsong na Mawhati Konstituensi kumjuh ia u Bah MD Syiem na Umroi Konstituensi.

Haba kren pdiang sngewbha ia ki nongialam ka UCPF nalor ka jingpynshai paidbah halor ka thong jong ka party Congress, u Bah PN Syiem kum u nongialam ba hakhmat ka party, u la pynpaw ia ka jingsngewkmen kaba khraw ban sakhi ba ka party Congress ka la nang kiew bad iohbor hapoh ka Umroi Konstituensi nalor kiwei kiwei ki Konstituensi ha kane ka district Ri Bhoi, ha kaba u la pynpaw, ba ka jingwan pyniasoh jong ki nongialam ka UCPF bad ki nongkyrshan kan long shisha ka jingkyrmen kaba khraw ia ka party ban poi sha ka thong ha kane ka ileksion MDC 2025. U la pynpaw ruh, ba kane ka ileksion MDC kaba mynta kan long shisha ka ileksion kaba kham pher na kiwei pat, namar ka jingdonkam jong ki paidbah ban sngewthuh kumno ban jied ia kita ki kyrtong ne ki party kiba don shisha ia ka thong ban shakri paidbah bad ia ka thong kumno ban wanrah ne thaw ia kita ki ain kiban iada ia ka ri bad ka jaidbynriew khamtam ha kaba ia dei bad ka District Council hapoh ka jylla Meghalaya, da kaba bynrap ruh, ba dei ka party Congress kaba la wanrah ia ka ain jong ka Sixth Schedule kawei na ki ain kaba iada ia ka riti ka dustur jong ka jaidbynriew.

Kum u nongialam ka party Congress, u la khot la wer ia ki paidbah nongkyrshan ka party Congress ba kin nang treishitom ban pynsngewthuh ia ki paidbah babun ba kin nym bakla ha kane ka kynti ban jied ia kita ki nongmihkhmat sha ka District Council khnang ba yn lah ban wanrah ia ka jingkylla ruh ha ka synshar khaddar bad ka jingwanrah ia ki ain kiba khlain kiban iada ia ka khyndew ka shyiap, ka riti ka dustur bad ki kam pynroi bapher bapher, bynrap u Bah PN Syiem..