Phah jingthoh u Pro Vice Chancellor NEHU ban pyndam ia ka jingialang EC ha Delhi

U Pro Vice Chancellor ka North Eastern Hills University (NEHU) u Prof. Sumarbin Umdor hynne ka sngi ula phah shithi sha u Registrar ka skulbah ban phah pyndam noh ia ka jingialang ka Executive Council kaba la thmu ban pynlong ha ka 14 tarik Naiwieng, 2025 ha Delhi ban khlieh u Prof. P.S. Shukla.U Pro VC ka NEHU ula phah pyndam ia kane ka jingialang hadien ba ki seng jong ki samla pule ka NEHU kynthup ka North Eastern Hills University Students Union (NEHUSU) bad ka Khasi Students Union (KSU) ki la tur sha ophis treikam jong u hynne ka sngi Hatmajai.U Pro VC haba kren sha ki samla pule u la ong ba ka jingphah pyndam noh ia ka jingialang ka EC kam dei na kano kano ka daw, hynrei namar ba um kwah ban mih ki jingjia kum ha u snem ba ladep kaban ktah ia ka pule puthi ki samla bad kumjuh ia ka kyrdan pule jong kane ka skulbah.

Lah ban kdew ba kine ki seng samla pule dang shen, ki la leit ban khang tala ia ka kamra jong ka Administrative Block jong ka skulbah North Eastern Hill University (NEHU) ban pyrshah ia ka jingialang jong ka Executive Council ba la thmu ban pynlong ha Delhi ban pyniaid u Vice Chancellor u Prof. Prabha Shankar Shukla.Halor kane, kum ban shu kdew na ka liang ka North-Eastern Hill University Teachers’ Association (NEHUTA) ruh ka la phah shithi sha baroh ki dkhot jong ka Executive Council ban kyntu ba kin ym leit iashim bynta ha ka jingialang jong ka Executive Council (EC) kaba la shu khot beain da u Vice Chancellor u Prof. PS Shukla ha Delhi.U President bad General Secretary ka NEHUTA u Prof. Lakhon Kma bad Dr. Marbhador M. Khymdeit, ki la pynpaw ia ka jingpyrshah jur namar ba u Prof. P. S. Shukla u Vice-Chancellor (VC) un shym la wantrei la jan shi snem bad u la pep haduh 354 sngi, hadien ba ki samla pule, ki nonghikai bad ki nongtrei ha katei ka skulbah ki la iakhih pyrshah ia ka jingialam bakla jong u ia ka skulbah la palat 3 snem tam.

Katkum ka jingong ki nongialam ka NEHUTA, ha ka 22 tarik Jymmang, 2025, ka tnad pule puthi na ka sorkar pdeng ki la wan jngoh ha Shillong bad ki la pyrshang ban weng ia ka jingeh ha kane ka skulbah ha kaba la lah ban wanrah biang ia ka jingsuk ha kane ka skulbah.“Ha ka jingiakren bad ki dkhot jong ka tnad pule puthi ka sorkar pdeng, ki la mynjur ha ryngkat ka jingdonlang ki dkhot jong ka Executive Council ka NEHU, North-Eastern Hill University Students’ Union (NEHUSU) bad NEHUTA, ba ka jingialang jong ka EC kaba long ha ka 30 tarik Jymmang, 2025 ha Delhi, kan dei ka jingialang kaba khatduh kaba yn khlieh da u Prof. Shukla bad hadien kane um dei ban tuklar shuh ia ki kam ha kane ka skulbah bad ia ki kam ki jam jong kane ka skulbah yn khmih da ka Pro Vice-Chancellor (PVCs) katkum ka kyndon jong kane ka skulbah,” ong ki nongialam ka NEHUTA.La ong ruh ba katkum ka shithi jong ka Ministry No. 20-13/2024-CU. IV, kaba la pynmih ha ka 20 tarik Nailar, 2024 sha baroh ki Vice Chancellors jong ki Central Universities, la kdew ba baroh ki jingialang jong ki skulbah kynthup ki jingialang jong ka Executive Council, Finance Committee, ne kino kino kiba hap hapoh ka skulbah , dei ban pyllong hi hapoh phyllaw jong ka skulbah.