Phasi ka khynnah namar ka Mobile, dei ka jinghiar thma u Soitan da ka mobile phone

Iwei i khynnah ba dang 10 snem ka rta iba dang pule klas IV ha shnong Thangshalai, Mawryngkneng, East Khasi Hills ila shim ia la ka jingim lajong da kaba phasi ha kamra thiah. Kane ka jingjia ka la pynkyndit ia ia ka shnong ka thaw baroh kawei bad khamtam ia ka longiing kaba mad ia kane ka jingjia kaba sngewsih. Katkum ka jingiathuh kiba haiing hasem jong ine i khynnah, kane ka la jia ha ka por kumba 2 baje tam eiei ha ka 22 tarik Nailur 2024, na ka daw ka mobile phone. I mei ieid jong ine I khynnah, i kong Airolin Kharumnuid ila iathuh ba ine i khynnah ila pan mobile na ka hymmen hynrei ka hymmen ka la ong ba in pule shwa ia ka kot namar ka don test khnang ba in lah bha, hynrei ha kata ka por, ila phet bak sha jingthiah da kaba khang ia ka jingkhang.“Ngi khlem poi pyrkhat ba in leh ia kane ka kam, tang na ka daw ka mobile,” ong I Meiied ine I khynnah.

I meiieid I iathuh ba ynda la wan ka para ar kmie jong i, kaba la leit khot ban ialehkai hynrei haba I la khot, khlem don ba jubab eiei bad kane kala pyllong ia i, ban leit peit noh na jingkhang iit nabar bad hangta ila iohi ia ka jingjia bad ila pyntip ia kiba don ha phyllaw. Mar mar ki leit ban peit hynrei ka jingkhang ka khang bad kila kyndar haduh ba kan plie bad haba ki rung ha kamra kila lap ba ila phasi da ka jain da kaba teh na u dieng khainshi. I la iathuh ba kila pyrshang ban ot ia ka jain ban pyllait im hynrei kam shym la seisoh shuh. Ha kajuh ka por kane ka jingjia ka la pynkyndit ia ka shnong ka thaw baroh kawei khamtam ia ka longiing.

Ha ka jingiakren bad u bah Iohstar Kharumnuid ula pynpaw ia ka jingkyndit halor kane ka jingjia ba phasi I khynnah ba dang 10 snem ka rta. U bah Iohstar Kharumnuid uba la pynpaw ba kane ka dei ka jinghiar thma jong u soitan ia u briew da ka mobile phone bad kan dei ruh ka jingsneng ia ki kmie ki kpa ba kim dei ban ai mobile.  “Kane ka jingjia kan dei ka jingsneng bad ka jinghikai ia ki kmie ki kpa kumno kin nang ban pyndonkam ia ka mobile ia ki khun jongki, ha kane ka pyrthei ba u soitan u hiar thma ban pynjot ia ki briew,” ong u bah Lohstar. U bah Iohstar u la ong ba kane ka jingjia kan dei ban long u diengsympat ia ki kmie ki kpa kumno ba kin hikai bad ba kin sneng ia ki khun jong ki, khamtam ha kaba iadei bad ka mobile phone. U bah Iohstar u la ong ba wat kiba la heh la san ruh ki dei ban nang ban pyndonkam ia ka mobile phone namar ba wat ki rangbah ruh kila shah ialam ia ka bym dei lyngba ka mobile phone ha kaba ki pyllut por bun ha mobile ban ia kaba iasyllok ia ki para briew, bad ban iasyllok bad ki khun ki kti.