Phi long ka jingkyrmen ban long ka jingshai ia ka jylla: DP Wahlang

Ka Nongstoin College ka la rakhe ïa ka sngi Graduation Day ha ka 24 tarik u Nailur, ha kaba la ai burom ïa 440 ngut ki samla pule, kynthup 383 ngut na ka Arts Stream, 41 ngut na ka Science bad 16 ngut na ka Commerce Stream. Ha kane ka sngi, Chief Secretary ka Sorkar Meghalaya, U Bah D.P Wahlang, ula long u Kongsan ha ryngkat ka jingiadonlang u Bah Macmillan Byrsat, MLA barim jong ka Nongstoin, uba dei ruh u Chairman jong ka Governing Body jong ka College, Dr. L. L Mawsor, President ka Sponsoring Body, u Symbud Deputy Commissioner ka WKH U Bah H. K Thabah, u Superintendent of Police WKH, u B. D Marak, ka Principal jong ka Nongstoin College Dr. (Mrs) Ïaisan Mawthoh, ki nonghikai, ki samla pule bad kiwei kiwei.  Ha kane ka jingrakhe, la pynkup burom kyrpang ruh ïa ki lai ngut ki samla pule kiba dei ki merit holders na ka college, kata U Bah Shembhalang Kharsyntiew u ba la ïoh ia ka kyrdan ba 7 ha ka Zoology (7th Position), i kong Habaphilari Kharbani, iba la ïoh ia ka kyrdan ba 8 ha ka Geography (8th position) bad i Kong Larihun L. Rngaid iba la ïoh ia ka kyrdan ba 9 (9th Position) ha ka Biochemistry. La ai jingithuh ruh ïa ki nonghikai jong kine ki lai tylli ki subject kiba la iarap ban kyntiew ïa ki samla pule ba kin ïoh ïa kine ki jingjop.

Kumjuh, ha katei ka sngi la ai burom ruh da ki memento bad certificate ia baroh ki samla pule ba la pyndep ia ka graduates jong ka batch 2024 ha ka Arts, Science, bad Commerce streams.Haba kren ha kane ka jingialang kum u Kongsan, U Bah D. P Wahlang, Chief Secretary ka sorkar Meghalaya, u la pynpaw ïa ka jingkordor jong kane ka sngi na ka bynta ka college bad khamtam ïa ki samla pule ba la pyndep ia ka graduate. U la ïaroh ruh ïa ki nonghikai bad ki dkhot ka faculty kiba la trei shitom ban ai jinghikai ba paka ïa ki samla pule ban kyntiew ïa ka jingnang jingstad jong ki. “Phi don ïa ka jingkyrmen ban long ka jingshai na ka bynta ban kyntiew shajrong ia ka jylla ha ki liang baroh kata lada phi jied ban trei ïa ki kam ha ka Sorkar, ka kamai kajih, ka pule puthi, ka kam shakri paidbah ne ha kano kano ka bynta. Haba phi sdang ïa kane ka sienjam ba thymmai, kynmaw ba ia ka jingjop jong phi, yn thew ïa ka, ym tang da ka burom ba phi ïoh, hynrei da ka jingleh babha kaba phi iarap lem na ka bynta kiwei de,” ong u Bah D. P Wahlang.

Shuh shuh u la bynrap ruh da kaba ong, ba mynta ka sngi ngi rakhe ia kane ka sngi, ym tang na ka bynta ka jingjop jongphi ha ka jingpule, hynrei na ka bynta ka jingjop nongphi ia ki jingialeh ha ka jingim bad ka jingnang roi nangsan ha ka jingnang jingtip. Namarkata, u la ai khublei ïa baroh ki samla pule kiba la kynjoh ïa kane ka thong bad u la pynpaw ka jingiaroh ïa ki kmie ki kpa bad ki nonghikai kiba la ai jingkyrshan bad ïalam lynti ïa ki.