U Nongialam ka United Democratic Party (UDP) ba dei ruh u Myntri Sorkar u Bah Paul Lyngdoh hynne ka sngi u la ther tyngeh ïa ka Voice of the People Party (VPP) ba ialam ia ka Executive Committee (EC) ha Khasi Hills Autonomous District Council (KHADC).
U Bah Paul ula ther halor ka jingkam u Executive Member (EM) ka Tnat Finance ka KHADC u Bah Seiborlang Warbah uba la kubur ba ka EC ka la iatakhuh shibun ki jingeh ha ka jingtreikam namar ka jingduna ka jingshemphang.
Haba kynthoh ïa ka jingleh jong ka EC ba ialam VPP ha ka Dorbar KHADC kaba dang shu dep, u Bah Paul u la ong, “Nyngkong eh, ngi don ïa u Nongïalam ka Liang Pyrshah uba tbit bha, u Bah Titosstarwell Chyne, uba lah kham bha ban jubab ïa ki jingkylli jong phi. Kaei kaba nga kwah ban ong ka long ba phim lah ban ai daw bym don jingtbit (experience). Hadien ba phi lah shah jied. Phim lah ban ong ba phi dang don hapdeng ka jingshah hikai”.
U ong baroh ki khmih lynti ba ki MDC ba la jied ki long kiba tip bha ia ki rules (kyndon), ki ain, bad ki kam synshar ha District Council. “Phi la rung ha ka kam ba la khmih lynti ba phin ialam. La khmih lynti ba phin tip ia ki kyndon, ki ain, ki kam bapher bapher jong ka Council. Ka dei ka kamram jong baroh ki MDC ba la jied ban pule ia ka Sixth Schedule bad ki ain bapher bapher” u la ong.
U la bynrap don ki khep ba ka High Court ka la buh jingkylli ïa ka nongrim aiñ jong ki rai jong ka Council. “Lada ki rai ba shim ka Council ka poi sha ka High Court bad ka Kashari ka lap ba ka Council ka pyntreikam ne pynmih ia ki hukum ki bym iahap katkum ki kyndon ain. Kata ka long kaba phylla ia nga” u la ong.
Haba kylli hato u kdew ïa ka rai jong ka ïingbishar halor ka jingpynkut noh ïa ki nongtrei dang shen ha KHADC, u la jubab, “Kata ka long kawei. Kaba ar ka long ban buh ïa ka khyrdop lum khajna ha kawei ka surok bah ba la bei tyngka da ka NHAI ban shna ia ka surok. Ka bor aiu ha ka pyrthei kan ai lad ia kawei pat ka tnat ban lum khajna na kawei ka surok kaba khlem shna da ma ki”.
U Myntri Sorkar ula ong, ba kam donkam ban don lypa ha ka kam (Experience) ban tip shaphang kita baroh hynrei ka donkam tang ban tip ia ki ain ki kanun.
Haba kynthoh ba u President ka VPP u dei uba la ieh bha ha ka kam sain hima, u Bah Paul ula ong “U President ka VPP ula long shibynta jong kiba bun ki seng saiñpyrthei ha ka Jylla. Kumta kumno phin kren shaphang ka jingbym don jingshemphang?”.